Ўзбекистон ҳуқуқ-тартибот идоралари Нью-Йоркда теракт уюштирган асли ўзбекистонлик Сайфулло Соипов ҳақида расмий баёнот берди. Баёнот матни «Жаҳон» агентлиги томонидан келтирилди.
Жорий йилнинг 31 октябрь АҚШнинг Нью-Йорк шаҳрида теракт содир этилди. Уни ижро этишда Ўзбекистоннинг 29 ёшли фуқароси Сайфулло Соипов гумон қилинмоқда.
Ўзбекистон Республикасининг тегишли органлари бу тахминни тасдиқлайди. Соипов Сайфулло Ҳабибулаевич 1988 йил 8 февралда Тошкентда туғилган. 2005 йили касб-ҳунар коллежини тамомлаган, 2005–2009 йилларда Тошкент молия институтида ўқиган. ОТМни тамомлагач, пойтахтдаги «Саёҳат» меҳмонхонасига бухгалтер сифатида ишга кирган. АҚШга чиқиб кетгунига қадар С. Соипов жиноий жавобгарликка тортилмаган ва, умуман олганда, ҳуқуқ-тартибот органлари нигоҳига тушмаган.
2010 йили Сайфулло Соипов грин-карт виза лотереясини ютиб олиб, ўша йили АҚШга чиқиб кетган. Охирги бир неча йил давомида у Ўзбекистонда туғилган, АҚШда вақтинча яшаб турган аёл билан фуқаролик никоҳида бўлган. Ўша пайтдан бери С. Соипов Ўзбекистонга бирор марта келмаган ва ҳали ҳам Тошкентда истиқомат қилаётган ота-онаси билан кўришмаган.
АҚШда экан, С. Соипов тегишли юридик нормаларга зид равишда Ўзбекистон дипломатик ваколатхоналарида консуллик рўйхатларига турмаган.
Маҳалла бўйича қўшнилари С. Соиповга жуда ижобий тавсиф бермоқда: уларнинг сўзларига қараганда, у ҳеч қандай гумон келтириб чиқармаган, ҳар доим бошқаларга нисбатан ўзини босиқ ва дўстона тутган. Фаровон оилада тарбияланган. Унинг ота-онаси анъанавий исломга ишонган ва экстремистик оқимлар билан алоқада гумон қилинмаган.
АҚШга кўчиб ўтгач, Сайфулло Соипов ёпиқ одамга айланиб, радикал гуруҳлар таъсирига тушиб қолган. Бу ҳақда АҚШ ОАВ уни билган одамларга таяниб хабар қилди.
Ўзбекистон Президенти Шавкат Мирзиёев ўзининг АҚШ Президенти Дональд Трампга юборган мактубида Нью-Йоркдаги беайб инсонлар ҳаётини олиб кетган террорчилик акти муносабати билан чуқур таъзия билдирди. Мамлакатимиз раҳбари Ўзбекистон томони теракт терговида барча куч ва воситаларни ишлатишга тайёрлигини билдирди.
Изоҳ (0)