Европа Лигасининг амалдаги ғолиби сифатида Чемпионлар Лигасига қадам қўйган Англиянинг «Манчестер Юнайтед» клуби, гуруҳ босқичининг 4-туридан кейиноқ гуруҳ етакчилигини қўлга киритиб бўлди. Назарий жиҳатдан «Базел» ва «ЦСКА» яна 2 та турдан кейин «МЮ» билан тенглаша олмайди.
Боиси, «Юнайтед» мазкур жамоаларни йирик ҳисобда мағлубиятга учратганди. 4-турда Жозе Моуриньо шогирдлари Португалиянинг «Бенфика» клубини таслим қилди — 2:0. Икер Касильясдан мусобақадаги энг ёш дарвозабон мақомини тортиб олган Миле Свилар дарвозасига шу куни 2 та пенальти тайин қилинди. Бирини 18 ёшли посбон бартараф қилган бўлса, иккинчисда Дейли Блинд мўлжалда адашмади.
Гуруҳдаги такрорий ўйинда эса Москванинг «ЦСКА» клуби «Базел»дан аламини олди. Томонларнинг Россия пойтахтида кечган ўйинида швейцариялик футболчилар 2 та гол фарқи билан зафар қучганди — 2:0. «Санкт-Якоб Парк» стадионида эса «армиячилар»нинг қўли баланд келди — 2:1.
Тўплар нисбатига кўра, «Базел» турнир жадвалида иккинчи бўлиб турибди. Назарий жиҳатдан «Бенфика»да гуруҳни 2-ўринда якунлаш учун имконият сақланиб турган бўлса-да, бу жуда қийин эканини қайд этиш керак. Бунинг учун Португалия клуби кейинги икки турда йирик ғалабаларга эришиши, рақиблари эса «Юнайтед»дан мағлубиятга учраши керак бўлади.
Европа Чемпионлар Лигаси «А» гуруҳи. 4-тур ўйинлари 31 октябрь, сешанба
«Базел» — «ЦСКА» 1:2
Голлар: Лука Дзуффи, 32 (1:0). Алан Дзагоев, 65 (1:1). Понтус Вернблум, 79 (1:2).«Манчестер Юнайтед» — «Бенфика» 2:0
Голлар: Миле Свилар, 45-авт (1:0). Дейли Блинд, 78-пен (2:0).Ноаниқ пенальти: Антони Марсьяль, 15 (Д).
Изоҳ (0)