Mourinyo va “Yunayted” Chempionlar Ligasi guruh bosqichida muddatidan avval peshqadam bo‘lib ulgurdi

Yevropa Ligasining amaldagi g‘olibi sifatida Chempionlar Ligasiga qadam qo‘ygan Angliyaning “Manchester Yunayted” klubi, guruh bosqichining 4-turidan keyinoq guruh yetakchiligini qo‘lga kiritib bo‘ldi. Nazariy jihatdan “Bazel” va “SSKA” yana 2 ta turdan keyin “MYu” bilan tenglasha olmaydi.

Boisi, “Yunayted” mazkur jamoalarni yirik hisobda mag‘lubiyatga uchratgandi. 4-turda Joze Mourinyo shogirdlari Portugaliyaning “Benfika” klubini taslim qildi — 2:0. Iker Kasilyasdan musobaqadagi eng yosh darvozabon maqomini tortib olgan Mile Svilar darvozasiga shu kuni 2 ta penalti tayin qilindi. Birini 18 yoshli posbon bartaraf qilgan bo‘lsa, ikkinchisda Deyli Blind mo‘ljalda adashmadi.

Guruhdagi takroriy o‘yinda esa Moskvaning “SSKA” klubi “Bazel”dan alamini oldi. Tomonlarning Rossiya poytaxtida kechgan o‘yinida shveysariyalik futbolchilar 2 ta gol farqi bilan zafar quchgandi — 2:0. “Sankt-Yakob Park” stadionida esa “armiyachilar”ning qo‘li baland keldi — 2:1.

To‘plar nisbatiga ko‘ra, “Bazel” turnir jadvalida ikkinchi bo‘lib turibdi. Nazariy jihatdan “Benfika”da guruhni 2-o‘rinda yakunlash uchun imkoniyat saqlanib turgan bo‘lsa-da, bu juda qiyin ekanini qayd etish kerak. Buning uchun Portugaliya klubi keyingi ikki turda yirik g‘alabalarga erishishi, raqiblari esa “Yunayted”dan mag‘lubiyatga uchrashi kerak bo‘ladi.

Yevropa Chempionlar Ligasi “A” guruhi. 4-tur o‘yinlari 31-oktabr, seshanba

“Bazel” — “SSKA” 1:2

“Manchester Yunayted” — “Benfika” 2:0