Американинг Google корпорацияси довулдан азият чеккан Пуэрто-Рико аҳолисига ҳавога учирилган шарлар орқали симсиз уланиладиган интернетдан фойдаланиш имконини тақдим этади, деб хабар беради «ТАСС».
Хабарда қайд этилишича, ҳозирча махсус ускуналар билан таъминланган бир нечта шарлар ҳавога учирилган. Улар ердан 18 минг метр баландликда жойлашган ва шарлар ёрдамида Wi-Fi’га уланиш мумкин. Шарлар қуёш энергиясидан қувват олади ва шунинг учун уларга фақат кундуз куни уланиш мумкин.
Корпорация яқин вақт ичида яна бир нечта аэростатларни ҳавога учиришни режалаштирмоқда.
Google АҚШнинг алоқа бўйича федерал комиссияси билан келишган ҳолда Пуэрто-Риконинг энг чекка ҳудудларида ҳам интернетдан фойдаланиш имконини берувчи 30 та шарларни учиришни режалаштирган.
Аввалроқ, АҚШнинг етакчи технологик компаниялари вакиллари Пуэрто-Рикони қўллаб-қувватлашга тайёрлиги ҳақида маълум қилган эди. Хусусан, Facebook асосчиси Марк Цукерберг орол давлатга довулдан сўнг ишдан чиққан коммуникацион инфратузилмаларни қайта тиклашга кўмаклашувчи мутахассислар гуруҳини жўнатишни режалаштираётганини айтган эди.
Tesla корпорацияси ходимлари Пуэрто-Рикодаги шифохоналарга қуёш батареяларини ўрнатишга киришди.
Изоҳ (0)