«Юпп Хайнкес макри». «Бавария» Бундеслигада пешқадам. Таъқибчиларнинг эса ҳаммаси мағлуб бўлди

Германия Бундеслигасининг 10-туридан кейин Мюнхеннинг «Бавария» клуби пешқадамга айланди.

Юпп Хайнкес жамоаси марказий ўйинда ўтган мавсум вице-чемпиони «Лейпциг»га қарши саф тортиб, 2:0 ҳисобида зафар қучди. Беллашувнинг соғлом рақобатда ўтишига 13-дақиқадаги четлатиш сабаб бўлди. Бир киши кам қолган меҳмонлар эса амалда бирор ишни уддалай олмади.

«Бавария» Германия Кубогида ҳам айнан «Лейпциг» билан тўқнаш келган бўлиб, ўшанда ҳам ҳакамлар вице-чемпионни майдонда бир киши кам қолдирганди. Бироқ «Лейпциг» 120 дақиқа тенг кураш олиб бориб, пенальтилар сериясида имкониятни бой берганди.

Юпп Хайнкес ва «Бавария» биринчи жиддий синовида 120 дақиқа ўйнаб, рақибини енга олмади

Хайнкеснинг «Бавария»га қайтиши нафақат жамоани кучайтирди, балки ашаддий рақиб — Дортмунднинг «Боруссия» клубини кучсизлантирди ҳам. Зеро, «Боруссия» уч турдирки, ғалаба нима эканини билмаяпти. Аввалига «Лейпциг»га имкониятни бой берган дортмундликлар (2:3), кейинроқ Франкфуртда «Айнтрахт» билан дуранг ўйнаганди — 2:2. Энди эса «Ганновер» Петер Бош жамоаси дарвозасига 4 та гол урди.

Ўтган мавсум якунларига кўра, Чемпионлар Лигасининг плей-оффида ўйнаш ҳуқуқини қўлга киритган ва 30 ёшли мутахассис бошқарадиган «Хоффенхайм» ҳам мазкур турда мағлубият аламини тотиб кўрди.

Германия Бундеслигаси 10-тур беллашувлари 28 октябрь, шанба

«Ганновер» — «Боруссия Д» 4:2

Голлар: Жонатас, 20-пен (1:0). Дан-Аксель Загаду, 27 (1:1). Илас Бебу, 40 (2:1). Андрей Ярмоленко, 52 (2:2). Феликс Клаус, 60 (3:2). Илас Бебу, 86 (4:2).Четлатиш: Дан-Аксель Загаду, 59 (Б).

«Хоффенхайм» — «Боруссия М» 1:3

Голлар: Керем Демирбай, 25 (1:0). Торган Азар, 61 (1:1). Маттиас Гинтер, 79 (1:2). Янник Вестергор, 82 (1:3).

«Бавария» — «Лейпциг» 2:0

Голлар: Хамес Родригес, 19 (1:0). Роберт Левандовски, 38 (2:0).Четлатиш: Вилли Орбан, 13 (Л).