“Yupp Xaynkes makri”. “Bavariya” Bundesligada peshqadam. Ta’qibchilarning esa hammasi mag‘lub bo‘ldi

Germaniya Bundesligasining 10-turidan keyin Myunxenning “Bavariya” klubi peshqadamga aylandi.

Yupp Xaynkes jamoasi markaziy o‘yinda o‘tgan mavsum vitse-chempioni “Leyptsig”ga qarshi saf tortib, 2:0 hisobida zafar quchdi. Bellashuvning sog‘lom raqobatda o‘tishiga 13-daqiqadagi chetlatish sabab bo‘ldi. Bir kishi kam qolgan mehmonlar esa amalda biror ishni uddalay olmadi.

“Bavariya” Germaniya Kubogida ham aynan “Leyptsig” bilan to‘qnash kelgan bo‘lib, o‘shanda ham hakamlar vitse-chempionni maydonda bir kishi kam qoldirgandi. Biroq “Leyptsig” 120 daqiqa teng kurash olib borib, penaltilar seriyasida imkoniyatni boy bergandi.

Yupp Xaynkes va “Bavariya” birinchi jiddiy sinovida 120 daqiqa o‘ynab, raqibini yenga olmadi

Xaynkesning “Bavariya”ga qaytishi nafaqat jamoani kuchaytirdi, balki ashaddiy raqib — Dortmundning “Borussiya” klubini kuchsizlantirdi ham. Zero, “Borussiya” uch turdirki, g‘alaba nima ekanini bilmayapti. Avvaliga “Leyptsig”ga imkoniyatni boy bergan dortmundliklar (2:3), keyinroq Frankfurtda “Ayntraxt” bilan durang o‘ynagandi — 2:2. Endi esa “Gannover” Peter Bosh jamoasi darvozasiga 4 ta gol urdi.

O‘tgan mavsum yakunlariga ko‘ra, Chempionlar Ligasining pley-offida o‘ynash huquqini qo‘lga kiritgan va 30 yoshli mutaxassis boshqaradigan “Xoffenxaym” ham mazkur turda mag‘lubiyat alamini totib ko‘rdi.

Germaniya Bundesligasi 10-tur bellashuvlari 28-oktabr, shanba

“Gannover” — “Borussiya D” 4:2

Gollar: Jonatas, 20-pen (1:0). Dan-Aksel Zagadu, 27 (1:1). Ilas Bebu, 40 (2:1). Andrey Yarmolenko, 52 (2:2). Feliks Klaus, 60 (3:2). Ilas Bebu, 86 (4:2).Chetlatish: Dan-Aksel Zagadu, 59 (B).

“Xoffenxaym” — “Borussiya M” 1:3

Gollar: Kerem Demirbay, 25 (1:0). Torgan Azar, 61 (1:1). Mattias Ginter, 79 (1:2). Yannik Vestergor, 82 (1:3).

“Bavariya” — “Leyptsig” 2:0

Gollar: Xames Rodriges, 19 (1:0). Robert Levandovski, 38 (2:0).Chetlatish: Villi Orban, 13 (L).