Ўзбекистон Республикаси Президенти Шавкат Мирзиёев раислигида 27 октябрь, жума куни хусусийлаштирилган давлат мулки негизида тадбиркорликни ривожлантириш, хусусийлаштирилган тадбиркорлик субъектларини қўллаб-қувватлаш борасида амалга оширилаётган ишлар таҳлилига бағишланган йиғилиш бўлиб ўтди. Бу ҳақда ЎзА хабар бермоқда.
Йиғилишда Хусусийлаштирилган корхоналарга кўмаклашиш ва рақобатни ривожлантириш давлат қўмитаси томонидан бажарилган ишлар таҳлил қилинар экан, корхоналар фаолияти самарадорлигини ошириш ва модернизациялаш, янги иш ўринлари яратиш, рақобатбардош маҳсулотлар тайёрлаш кўламини кенгайтириш, рухсат берувчи ҳужжатларни олиш, коммуникация тармоқларига уланиш ва тижорат банкларидан кредит ажратилишида уларга кўмаклашиш мақсадида хусусийлаштирилган корхоналарни ривожлантиришнинг «йўл харитаси»ни ишлаб чиқиш ва жорий этиш бўйича қилинаётган ишлар қониқарсиз, деб баҳоланди.
Мутасаддиларга мулк эгалари билан биргаликда ишламай турган 1200 объект фаолиятини тиклаш ва ривожлантириш юзасидан лойиҳалар ва «йўл харитаси» ишлаб чиқиш ҳамда уларни амалга оширишни таъминлаш бўйича изчил чора-тадбирлар кўриш юзасидан топшириқлар берилди.
Жорий йилда 408 давлат объекти хусусий мулкдорларга сотилди. Уларнинг 278 таси 1,6 триллион сўмлик инвестиция киритиш ва 10 мингдан ортиқ иш ўрни яратиш шарти билан «нол» қийматида берилди.
Бугунги кунда яна 388 давлат объекти сотувга қўйилган бўлиб, уларнинг 161 тасини «нол» қиймат бўйича бериш режалаштирилган.
Йиғилишда хусусийлаштирилган корхоналарнинг ишлаб чиқариш фаолияти ва молиявий-иқтисодий аҳволини мониторинг қилиш, уларни кредит ва моддий ресурслар билан таъминлаш, мавжуд муаммолар ва уларнинг сабабларини аниқлаш, муҳандислик ишлаб чиқариш инфратузилмасини тиклаш, бозор топишда тадбиркорларга амалий кўмак бериш масалаларига давлат идоралари томонидан етарлича эътибор қаратилмаётгани таъкидланди.
Рақобат муҳити ва қимматли қоғозлар бозорини ривожлантириш, истеъмолчилар ҳуқуқларини муҳофаза қилиш, биржа фаолиятини лицензиялаш, замонавий кадрларни тизимли тайёрлаш, қайта тайёрлаш ва малакасини ошириш, соҳага энг ривожланган давлатлар тажрибасини татбиқ этиш каби масалалар муҳокама қилинди.
Изоҳ (0)