Индонезия расмийлари Агунг тоғида вулқон отилиши хавфи камайганига қарамай, Бали курортидаги фавқулодда вазият тартибини узайтирди. Бу ҳақда «ТАСС» хабар бермоқда.
Ҳукуматнинг Табиий офатлар олдини олиш агентлиги ва бошқа муассасалар вакиллари иштирокидаги йиғилишидан сўнг шундай қарор қабул қилинди. Расмийлар хавфли ҳудуд радиусини 12 километрдан 6 километргача қисқартирмоқчи эди, бироқ мутахассислар бу режани қўллаб-қувватламади.
Маҳаллий ҳукуматнинг дастлабки ҳисоб-китобларига кўра, 22 сентябрда эълон қилинган фавқулодда вазият тартиби туфайли кўрилган зарар 146 миллион долларни ташкил этди.
Бу суммага, жумладан, 134 минг кишидан иборат маҳаллий аҳолини эвакуация қилиш харажатлари, шунингдек, хорижий сайёҳларнинг Балига сафардан воз кечиши оқибатида кўрилган зарар киради.
Изоҳ (0)