Тайвань маъмурияти раҳбари Цай Инвэнь 26 октябрь куни Пекинни орол ҳукумати билан узоқ давом этган адоватга нуқта қўйиш учун музокара ўтказишга чорлади. Бу ҳақда «ТАСС» хабар бермоқда.
Цай Инвэнь Хитой компартияси «бошқарувнинг янги даври»га ўтаётганини маълум қилиб, Тайвань бўғозининг икки соҳили ўртасидаги муносабатларни яхшилашнинг айни пайти келганини таъкидлади.
«Ҳозир ўзгаришлар учун айни фурсат келди. Мен ҳар иккала томонни аҳолининг узоқ муддатли фаровонлиги учун муросага келишга ва адоватга барҳам беришга чақираман», — дейди.
Пекин 1949 йилдаги фуқаролар урушидан кейин Тайвань устидан бошқарувни қўлдан бой берган эди. Бироқ ўз-ўзини бошқарувчи орол мустақиллиги ҳақида расман эълон қилгудек бўлса, мамлакат ҳарбий кучларни ишга солиши эҳтимоли мавжуд.
2008—2016 йилларда Тайвань ва Хитой ўртасидаги муносабатлар илиқлашган эди. Бироқ Тайвань ҳукуматига Цай Инвэнь раҳбар бўлиб келганидан сўнг муносабатлар яна кескинлашди.
Изоҳ (0)