Ёшлар ўртасидаги Осиё Чемпионатининг саралаш турнирига тайёргарлик кўраётган Ўзбекистон термаси «Бунёдкор» стадионида Амирлик терма жамоасига қарши такрорий ўйинда майдонга тушиб, бу сафар ҳам зафар қучди — 4:1. Томонларнинг икки кун олдин шу стадионда ўтган илк ўйинида Ислом Кенжабоевнинг пенальтидан урган ягона голи ўзбекистонлик футболчиларга ғалаба олиб келганди.
Доҳада Қатардан устун келган Ўзбекистон ёшлари, энди «Бунёдкор»да Амирлик термасини мағлуб этди
Энди ҳар икки мамлакат ёшлари тайёргарликнинг сўнгги босқичини якунлади. Октябрь сўнгидан бошлаб улар саралаш турнирида иштирок этади. Қайд этиш керак, Александр Мочинов мураббийлигидаги Ўзбекистон термаси бунгача Доҳага бориб, Қатар ёшлари дарвозасига ҳам 4 та гол уришга муваффақ бўлганди.ЎФФ президенти Қатарда вақти Ўзбекистон термаси Қатар ёшларига 4 та гол урди
Ўзбекистон саралашни Тожикистонда ўтказади ва мезбонлардан ташқари, Шри-Ланка, Бангладеш, Малдив ороллари термалари билан куч синашади. Амирлик ёшларининг Тошкентга келиши ҳам бежиз эмас. Чунки улар саралашни Қирғизистонда, мезбонлардан ташқари, Баҳрайн, Уммон ва Непалга қарши ўтказади.
Ўзбекистон U19 — БАА U19 4:1
Голлар: Дилшод Саидов, 19-пен (1:0). Жаҳонгир Абдусаломов, 38 (2:0). Шоҳрух Абдураҳмонов, 73 (3:0). Жасур Эрмаматов, 88 (4:0). Аҳмад Фавзий, 92+ (4:1).Ўзбекистон ва БАА ёшларининг ҳар икки ўйинида ҳам ўзбекистонлик футболчиларнинг қўли баланд келди. Бунгача Равшан Ҳайдаров мураббийлигидаги Ўзбекистон олимпия термаси Амирликларда ўтган Осиё Чемпионатининг саралаш турнирида БАА устидан 2:0 ҳисобида зафар қучиб, рақибини гуруҳда қолдириб кетганди.
Энди эса ҳар икки мамлакат миллий термалари 14 ноябрь куни ўзаро майдонга чиқади. Учрашув БААда бўлиб ўтади. Унда ўзбекистонлик футболчиларни «Насаф» устози Рўзиқул Бердиев майдонга бошлаб чиқади. Бунда легионер футболчилар ўйинга чақирилмайди ва фақатгина Олий Лигада тўп сураётган йигитлар хизматидан фойдаланилади.
Изоҳ (0)