Тошкентнинг «Пахтакор» клубига қарши Олий Лиганинг 25-турида майдонга тушган «Бухоро» футбол клуби 55 миллион сўм жаримага тортилди. Бу ҳақда ПФЛ матбуот хизмати хабар берди.
Беллашувда можароли вазиятлар юзага келгани айтилган. ПФЛ бунда умумий гаплар билан чекланган бўлиб, конкрет нималар бўлганига ойдинлик киритмаган. «Бухоро» футбол клуби тартиб тўлиқ таъминланмаганликда, клуб расмий ходимларининг белгиланган тартиб-интизом ва қоидаларга тўлиқ риоя этмаганликда, шунингдек, учрашув расмийларининг хавфсизлигини етарли даражада таъминланмаганликда айбланган.
Оқибатда ПФЛ алоҳида мажлис чақирган, видеоёзувларни ўрганиб чиққан. Кейин эса учрашув назоратчиси ҳамда ПФЛ вакилининг билдиргисини инобатга олиб, Ўзбекистон ярим ҳаваскор ва ярим профессионал футбол клублари ўртасидаги мусобақа регламенти, Тартиб-интизом кодекси 5-моддасига асосан «Бухоро» клубини жаримага тортишга қарор қилган.
Эндиликда «Бухоро» клуби регламент 5-моддасининг бир нечта бўлимига кўра айбланувчи мақомидадир. Жумладан, клуб 1-бўлим, 5.4-бандга асосан 20 миллион сўм, 5.6-бандга асосан 5 миллион сўм, 5.9-бандга асосан 10 миллион сўм, 5.10-бандга асосан яна 10 миллион сўм, 2-бўлим, 5.36-бандга асосан қўшимча 10 миллион сўм, жами — 55 миллион сўм тўлашга мажбур этилади.
Шунга ўхшаш вазият яна такрорланадиган бўлса, «Бухоро» футбол клуби ўз майдонидаги учрашувларни мухлисларсиз ёки нейтрал стадионларда ўтказишга мажбур этилиши мумкин.
«Пахтакор» икки тур аввал Наманганда «Навбаҳор» меҳмони бўлганида, мезбонлар жаримага тортилганди. Кейин «Пахтакор»нинг Тошкентдаги «Қўқон—1912»га қарши учрашувидан кейин 4 нафар ҳакам ва бир назоратчи мавсум якунига кўра футболдан четлатилганди. Маълумот учун, «Пахтакор» навбатдаги турни 26 октябрь куни «Бунёдкор»га қарши ўтказади.
Дўпписини ол деса... Қанот ҳаками хато қилди, ЎФФ эса 4 ҳакам ва назоратчини футболдан четлатди
Матбуот анжуманига футбол фанатларини киритган «Навбаҳор» ПФЛ томонидан жаримага тортилди
Бунгача «Championat.asia» нашри журналисти Шаҳбоз Беғамов «Бухоро» — «Пахтакор» ўйинида иштирок этиб, стадион сухандони тошкентликлардан Игорь Сергеев алмаштирилаётганда футболчини Игорь Бабаян деб қасддан таништиргани ва уни ерга ургани, бухороликлар дарвозасига ҳакам Шерзод Қосимов томонидан пенальти белгилангач эса клуб камерачиси ва сухандони ПФЛ вакилини ҳақорат қилгани ҳақида ёзганди. «Sports.uz» эса беллашув видеосини сайтига жойлади.Норасмий маълумотларга кўра, хавфсизлик хизмати ходимлари ўз вазифасини тўлиқ бажармаган ва мухлислар кириш мумкин бўлмаган жойларда юраверган. ПФЛ конкрет маълумотларни эълон қиладими ёки йўқ — аниқ эмас.
Изоҳ (0)