Россиядаги Шимолий Кореяга йўлланмаларга ихтисослашган биринчи агентлик — НКореан ушбу мамлакатга АҚШ билан ядро уруши хавфи туфайли сайёҳлар оқими камаймаганини қайд этди. Бу ҳақда мазкур фирма сотувлар бўйича менежери Юлия Хапряшкина «Москва» шаҳар янгиликлари агентлигига маълум қилди.
«Биз август охиридан бери ишлаяпмиз. Сайёҳлар оқими шу пайтгача барқарор ва фаол, пасайиш кузатилмади. 30-октябрда катта гуруҳ жўнаб кетяпти, Янги йилга, январь ойида тоғ-чанғи курортида дам олишга, ҳатто апрелда Пхеньянда бўлиб ўтадиган халқаро марафонга буюртмалар бор. Одамлар боряпти, қизиқиш бор, ҳеч ким ҳеч нарсадан чўчиётгани йўқ», — деди Хапряшкина.
Менежерга кўра, агентлик нархи 60 мингдан 140 минг рублгача (1000 доллардан 2,4 минг долларгача), давомийлиги эса 5 кундан 15 кунгача бўлган турларни таклиф этмоқда. Пхеньянга парвоз Владивосток шаҳридан амалга оширилади.
Экскурсиялар Пхеньян ва унинг яқинидаги ҳудудларга сайёҳат, тоғ-чанғи турлари Масикрен курорти, пляж турлари эса Мазон курортига сафарни ўз ичига олади.
Изоҳ (0)