Россия Финляндия учун таҳдид эмас, шу билан бирга, Хелсинки келгусида НАТОга қўшилишини ҳам истисно этмайди. Бу ҳақда Финляндия ташқи ишлар вазири Тимо Сойни «Коммерсантъ» нашрига берган интервьюсида маълум қилди, дея хабар беради «Корреспондент.net».
«Финляндия Россия томонидан хавфни сезаётгани ва ҳеч нарсадан чўчиётгани йўқ. Икки давлат ўртасида ижобий муносабатлар ўрнатилган ва чиндан ҳам муаммолар йўқ. Ташқи сиёсатимиз барча, биринчи галда, қўшнилар билан яхши алоқаларга асосланган. Шу билан бирга, Евроиттифоқ, БМТ, Шимолий кенгашга аъзомиз, НАТО билан шерикчилигимиз бор», —деди Сойни.
Финляндия Швеция НАТО билан янада яқин ҳамкорликка қарор қилгудек бўлса, ундан ўрнак олиши ёки йўқлиги ҳақидаги саволга жавобан Сойни бу мавзу на Хелсинки, на Стокгольмда муҳокама этилаётганини билдирди.
«Икки давлат ҳам НАТОга аъзо эмас, ҳозир бу мавзу муҳокама этилаётгани ҳам йўқ. Шу билан бирга, НАТОга қўшилиш имкониятини истисно этмаслигимиз лозим. Исталган мамлакат шундай имкониятга эга бўлиши керак, шу сабабли очиқ эшиклар сиёсати зарур. Бироқ Финляндия ҳукумати айни пайтда бу масалани долзарб эмас деб ҳисобламоқда», — хулоса қилди ташқи ишлар вазири.
Изоҳ (0)