19 октябрь куни Ўзбекистон халқ таълими вазирининг янги ўринбосари тайинланди. Вазирлик ахборот хизмати хабарига кўра, шу вақтгача Молия вазирлигининг Давлат бюджети бош бошқармаси бошлиғи ўринбосари лавозимида ишлаб келган Жаҳонгир Сиддиқов халқ таълими вазири ўринбосари этиб тайинланган.
Жаҳонгир Сиддиқов 1978 йил Жиззах вилояти Ғаллаорол туманида туғилган. 1999 йил Тошкент Молия институтини бакалавриатитурасини, 2001 йил шу институт магистратурасини, 2007 йилда Франция Миллий ғазначилик мактабини тамомлаган.
Меҳнат фаолиятини 2001 йили Молия вазирлиги Давлат бюджети бош бошқармаси бюджет сиёсати ва жамланган бюджетни режалаштириш бўлимида 1-тоифали иқтисодчи сифатида бошлаб, кейинги 16 йил давомида фақат шу ерда ишлаган ва бошқарма бошлиғи ўринбосари даражасигача кўтарилган.
17 октябрь куни Дилшод Кенжаев халқ таълими вазири ўринбосари лавозимига қайтарилгани маълум бўлган эди. 19 октябрь куни эса 2017 йил июнь ойидан бери вазирлик раҳбарининг биринчи ўринбосари лавозимида меҳнат қилиб келаётган Собитхон Турғунов Ўзбекистон мактабгача таълим вазири ўринбосари этиб тайинланди.
Дилшод Кенжаев ва Жаҳонгир Сиддиқовдан ташқари Ўзбекистон халқ таълими вазири Улуғбек Иноятовнинг яна бир ўринбосари бор — 2017 йил 3 июль куни 23 ёшли Алишер Саъдуллаев вазир ўринбосари этиб тайинланган эди. У Ўзбекистон ҳукумати таркибидаги энг ёш амалдорлардан биридир.
Изоҳ (0)