Ўзбекистон Олий Мажлиси Қонунчилик палатасининг 19 октябрь куни бўлиб ўтган навбатдаги мажлисида депутатлар янгиланган Фуқаролик процессуал кодекси тўғрисидаги қонун лойиҳасини биринчи ўқишда кўриб чиқди, дея хабар бермоқда ЎзА.
«Ўзбекистон Республикасининг Фуқаролик процессуал кодексини тасдиқлаш тўғрисида»ги қонун лойиҳасини кўриб чиқиш давомида депутатлар Фуқаролик процессуал кодексининг тузилиши ўзгартирилганлигини қайд этди.
Хабар беришларича, ушбу қонун лойиҳаси жорий йил 12 апрелда қабул қилинган «‘Судлар тўғрисидаъги Ўзбекистон Республикаси қонунига, Ўзбекистон Республикасининг Фуқаролик процессуал ва Хўжалик процессуал кодексларига ўзгартиш ва қўшимчалар киритиш ҳақида»ги қонунининг ижросини таъминлаш мақсадида Олий суд томонидан тайёрланган.Қайд этишларича, мазкур кодекс лойиҳаси янада қулай шаклда ва мантиқий кетма-кетликда баён этилган. Мавжуд ҳуқуқий камчиликларни тўлдириш мақсадида фуқаролик суд ишларини юритишнинг процессуал қоидалари анча батафсил тартибга солинган.
Фуқаролик процессуал кодексини тайёрлаш жараёнида хорижий давлатларнинг, хусусан, Германия, Франциянинг ва бир қатор МДҲ мамлакатларининг фуқаролик процессуал қонун ҳужжатлари ўрганиб чиқилди.
Таъкидлаб ўтилганидек, лойиҳада протест келтириш тўғрисидаги аризаларни назорат тартибида кўриб чиқишнинг янги тартиби назарда тутилган.
Унга мувофиқ бундай аризани қабул қилиш ёки уни назорат тартибида кўриб чиқишни рад этиш судьянинг ажрими асосида ҳал этилади ҳамда ушбу ажримга Олий суд раиси ёки унинг ўринбосарлари норозилик билдиришлари мумкин. Бундай ҳолатда иш аризани кўриб чиқиш учун назорат инстанциясининг судига ўтказилади.
Фуқаролик процессуал кодексига киритилиши назарда тутилаётган ўзгартиш ва қўшимчалар келгусида биринчи суд инстанцияларида ишни қайта-қайта кўриб чиқиш ҳолларининг олдини олиш имконини беради. Бу, ўз навбатида, фуқаролик ишидаги тарафларнинг бузилган ҳуқуқларини ишончли ҳимоя қилишни таъминлайди.
Мажлисда Олий Мажлис Қонунчилик палатасининг ваколатларига тааллуқли бошқа масалалар ҳам кўриб чиқилди.
Изоҳ (0)