Урганч шаҳридаги кўп қаватли уйларнинг бирида яшовчи ака-укалар — 1961 йилда туғилган М.Р. ва 1963 йилда туғилган И.М. этил спиртидан заҳарланиш оқибатида вафот этди. Бу ҳақда Хоразм вилоят ИИБ хабар берди.
Хабарга кўра, Ака-уканинг ҳеч бирида оила бўлмаган ва мазкур хонадонда фақат иккови яшаган. Уларнинг 2—3 кундан буён кўринмай қолганидан шубҳаланган қўшнилар 2017 йил 17-октябр куни ички ишлар бўлимига хабар берган. Олинган хабар асосида зудлик билан етиб келган тергов-тезкор гуруҳи аъзолари хонадон эшигини очиб киргач, ака-уканинг ўз уйида ўлиб ётганлигини аниқлаган.
Мурдаларнинг баданида ҳеч қандай жароҳат излари йўқлиги сабабли, тезкор ходимларнинг диққатини шу ерда турган тиббиёт этил спиртининг бўшаган иккита пластик идиши тортди.
Ўтказилган суд-тиббий экспертизаси хулосасидан кейин тезкор ходимларнинг гумони асосли бўлиб чиқди. Ака-ука этил спиртидан заҳарланиши оқибатида вафот этганлиги маълум бўлди.
Ҳолат юзасидан прокуратура органлари томонидан суриштирув ишлари олиб борилмоқда.
Изоҳ (0)