HP ZBook x2: дунёдаги энг бақувват планшет тақдим этилди

HP компанияси рассомлар ва дизайнерларга мўлжалланган энг бақувват планшетли иш станциясини тақдим этди, деб ёзади «Hi-tech.mail.ru».

Қурилма ижод учун Adobe Creative Cloud ва бошқа дастурлардан фойдаланувчи профессионаллар учун яратилди. HP ZBook x2 нинг асосий рақиби Microsoft Surface Pro бўлиши мумкин, у ҳам профессионалларга мўлжалланган.

HP ZBook x2 литий-магний қотишмасидан тайёрланган бўлиб, планшет режимида 1,6 кг, ноутбук режимида 2,1 кг тош босади. Қурилма 14 дюймли 4K сенсорли дисплей билан жиҳозланган. Планшетга тўрт ядроли Intel Core процессори ўрнатилган.

HP ZBook x2 32 Гб тезкор (бошқа планшетларникидан икки карра каттароқ) ва 2 Тб доимий хотирага эга. У графикага Surface Pro’га нисбатан 73 фоизга тезроқ ишлов бера олади.

ZBook х2 10 соатгача автоном ишлай олади. Тезкор қувват олиш технологияси шарофати билан, 30 дақиқада қурилма 50 фоизгача қувваланади.

Планшет декабрда 1749 доллардан бошланадиган нархда сотувга чиқади.