Apple’нинг янги эгилувчан смартфони ҳақида батафсил маълумотлар пайдо бўлди

Apple компанияси LG билан биргаликда iPhone учун мутлақо янги эгилувчан экран устида иш олиб бораётгани ҳақида миш-мишлар тарқалди. Компания ушбу режаларини сир сақлашни давом этмоқда, деб хабар берди «Hi-tech.mail.ru».

Янги патент аризаси Apple’га эгилувчан дисплейли қурилмани ишлаб чиқариш имконини берувчи экран технологиясини тавсифлайди. Патент аризаси нисбатан янги ҳисобланади — у 2016 йилнинг 30 августида берилган.

Патентда Apple ўзининг бир қатор маҳсулотларида, жумладан, OLED экрани ва миcро LED’ларда қўллаши мумкин бўлган экран технологияси ҳақида сўз боради. Шу билан бирга технология нафақат смартфонларнинг эгилувчан экрани сифатида қўлланилиши мумкин, балки ўз ичига ноутбукларни, планшетларни, қўл соатларини ва компания томонидан ишлаб чиқариладиган бошқа қурилмаларни ҳам ўз ичига олади.

Патент ушбу технологияда асосий эътиборни тасвирни бузмайдиган ва унинг сифатига таъсир этмайдиган эгилувчан қурилмага қаратган. Экранни худди китобни ёки фаол дисплейли ноутбук каби эгиш мумкин. Шунингдек, қурилмани ҳамён каби тахласа ҳам бўлади, бунда дисплей гаджетнинг ташқи юзасини эгаллайди.

Умуман олганда, Apple айни вақтда ушбу технологияни ўрганиб чиқмоқда ва яқин йилларда қўлламайди. Бошқа томондан Samsung ўзининг биринчи эгилувчан смартфонини оммавий ишлаб чиқришга тайёр, Apple’да эса бунга жавоб бўлиши керак.