Олтин трап, минглаб хизматкорлар ва тўлиғича банд қилинган Four Seasons меҳмонхонаси — Саудия Арабистони қиролининг Россияга биринчи ташрифи шулар билан ҳам эсда қолади. Монархни кузатган Forbes Life OneTwoTrip’даги ҳамкасби билан боғланиб, бошқа дунёвий етакчилар қандай саёҳат қилишини ҳикоя қилишни сўради. Нашр Рим папаси Франциск чамадончасида нима сақланиши, нега шаҳзода Уильям ўғли билан саёҳат қила олмаслиги ва Бруней султони самолёти бортида нима борлиги ҳақида ҳикоя қилади.
Буюк Британия қироллик оиласи
Шаҳзода Уильям ва Кейт Миддлтон охирги йилларда бир нечта жаҳон турнеларини амалга оширди: улар Янги Зеландия, Австралия, Ҳиндистон, Бутан ва Канадага расмий ташриф билан борди. Барча саёҳатларда қироллик оиласига Буюк Британия Ҳарбий-денгиз кучлари шифокори ва 10—20 кишидан иборат кичикроқ мулозимлар гуруҳи ҳамроҳлик қилади.
Қоидага кўра, икки монарх: масалан, шаҳзода Чарлььз ва қиролича ёки шаҳзода Чарлз ва шаҳзода Уильям битта самолётда уча олмайди. Хавфсизлик жиҳатидан шундай қилинади. Шаҳзода Уильям ўғли шаҳзода Жорж 12 ёшга тўлгунга қадар битта самолётда бўлиши мумкин.
Сафар олдидан Букингем саройи монарх йўл олган мамлакатлар бош ошпазлари билан боғланади ва менюни келишади. Асосий шартлардан бири: таомларда зираворлар минимум даражада бўлиши керак. Британия монархлари сафарлари давомида заҳарланиб қолиш осон бўлган денгиз маҳсулотлари истеъмол қилмайди.
АҚШ президенти
Ҳар бир мамлакатда давлатнинг биринчи шахсларини олиб юрувчи «биринчи рақамли борт» бор. АҚШда бу Boeing VC-25А. Унда президентнинг ишчи кабинети ва меҳмонлар учун қабулхона бор, президент апартаментлари эса ҳаво кемасининг бурнида жойлашган. Президент самолётига 100 дан ортиқ одам бемалол жойлашиши мумкин. Айтишларича, Американинг ҳозирги етакчиси самолётида доим кетчуп бутилкаси сақланади. Бу исталган жойда президентга унинг севимли стейкини тортиш учун керак. Америка президентини доим кўп сонли шахсий қўриқчилар (баъзан улар бутун бир меҳмонхонани эгаллайди) ҳамроҳлик қилади, ўзи эса фақат зирҳланган автомобилда ҳаракатланади.
Саудия Арабистони қироли
Саудия Арабистони қироли Салмон ибн Абдул-Азиз ибн Абдураҳмон Ал Сауд ҳашамат билан саёҳат қилишни хуш кўради: жорий йилнинг мартида у Осиё бўйлаб турнега чиқиб, унга 1 500 кишилик мулозимлар ҳамроҳлик қилди. Қирол 459 тонна багажли 36 та самолётда, иккита Mercedes S600 лимузинида ва самолёт трапи сифатида қўлланадиган олтин суви юритилган икки эскалатор билан ҳаракатланди. Қирол хавфсизлиги учун 100 дан ортиқ шахсий қўриқчи жавобгар бўлди. Монарх ҳашаматга ўрганган — исталган меҳмонхонада у учун қимматбаҳо араб гиламлари ёзилади. Улар дунё бўйлаб унинг ортидан олиб юрилади.
Рим папаси
Рим папаси доим ватиканлик мансабдорлар ва шахсий матбуот-хизмати ҳамроҳлигида саёҳат қилади. Папа Франциск исталган сафарга кичикроқ саквояж олади. Унда дуолар матнлари бўлган диний китоб (бревиарий), бўлажак учрашувлар жадвали бўлган ён дафтарча, мутолаа учун китоб ва устарани олиб юради. Рим папаси Католик черкови раҳбари эканлигига қарамасдан, камтарона саёҳат қулади — шунчаки Alitalia авиакомпаниясидан ҳаво кемасини ижарага олади.
Бруней султони
Брунейнинг биринчи юзи — Ҳасан Болкиах сайёранинг энг бой кишиларидан бири. Бруней султони ўз Boeing 747-400 самолётини мустақил бошқаради. Ҳаво кемасини безатиш султонга 120 миллион долларга тушган. Самолётнинг меҳмонхона, ётоқхона ва ванна хонаси қимматбаҳо металлар ва кристаллар билан безатилган, раковиналар эса яхлит олтиндан ишланган. Болкиах ўзи билан 400 кишидан кам бўлмаган мулозимларни олиб юради.
Марокаш қироли
Марокаш қироли Муҳаммад VI мамлакат бўйлаб Mercedes’да ҳаракатланади. Унга қўриқчилар кортежи ҳамкорлик қилади. Хорижий сафарлар учун эса бортида кинотеатр ва билярди бўлган шахсий самолётидан фойдаланади. Йил давомида мамлакат бўйлаб 12 та қироллик саройида соҳибининг келишига ҳамма нарса тайёр ва об-ҳаводан қатъий назар 17 даража ҳарорат сақланади. Монарх автомобилларнинг катта коллекциясига эга, улар орасида Aston Martin, Maybach, Rolls-Royce ва Ferrari ҳам бўлиб, уларда қирол қароргоҳлари ўртасида ҳаракатланади.
Изоҳ (0)