Миробод туман жиноят ишлари бўйича судида Боровский номидаги тиббиёт коллежи ўқувчиси Жасур Иброҳимовнинг иши юзасидан яна бир гувоҳ — Дилшод Абдуллаев кўрсатма берди, дея маълум қилди «Новости Узбекистана».
Ўшанда айнан Дилшод Жасурни «синглисига» гап отмаслиги борасида огоҳлантирган эди. Уларнинг суҳбатига аралашган Ислом Тўлаганов «Дилшод ака, қўйинг, Жасурнинг жароҳати бор, у касал бўлган» деган. Шундан сўнг, Жасур Иброҳимов ҳамда Ислом Тўлаганов ўртасида можаро келиб чиққан.
Ушбу жанжалнинг гувоҳи бўлган барча воқеани айнан шундай сўзлаб берган. Бироқ улардан ҳеч бири можаро келиб чиқишига сабабчи бўлган қиз ким эканлигини аниқ тушунтириб бера олмаган. Бунга нохуш ҳодиса содир бўлганида тиббиёт коллежининг 3-курсида ўқиган, ҳозирда Тошкент давлат иқтисодиёт университетининг талабаси Дилшод Абдуллаев ойдинлик киритди.
Унинг сўзларига кўра, қизнинг исми Габриэль, у ҳам ўша коллежда ўқийди. Қиз Дилшодга қондош сингил эмас, бироқ улар бирга улғайган ва у Габриэлга туғишганидек муносабатда бўлганлиги сабаб, уни ҳимоя қилиб юрган. Бироқ Дилшод Абдуллаев тез-тез чалкашиб кетган ва қайсидир онда дастлабки тергов вақтида берган кўрсатмасидан воз кечишига ҳам тайёр бўлган.
Саволларга жавоб берган Абдуллаевнинг айтишича, умуман олганда Габриэль унга тутинган сингил эмас, шунчаки Кореяга жўнаб кетган дўстининг яхши кўрган қизи, у Дилшодга суюклисига қараб туришни топшириб кетган. Шу орада Дилшод қизнинг Жасур билан ёзишаётганидан хабар топиб қолган ва у билан «эркакча» гаплашиб олишга қарор қилган.
Исмоиловнинг адвокати томонидан «Габриэль шундай қилишни сўраганмиди?», дея берилган саволга Дилшод бу ўзининг ташаббуси бўлганлигини айтди. Габриэль судда кўрсатма берадими ёки йўқ ҳозирча номаълум. Суднинг навбатдаги йиғилиши жорий йилнинг 12 октябрь куни бўлиб ўтади.
Изоҳ (0)