Мексиканинг энг бадавлат фуқароси, телекоммуникацион магнат Карлос Слим ўтган ойда мамлакатда юз берган иккита кучли зилзиладан сўнг бўладиган қайта қурилиш ишлари янги иш ўринларини яратишини маълум қилди, деб хабар беради Associated Press.
Миллиардернинг сўзларига кўра, табиат ҳодисасидан йирик зарар кўрган Мехико шаҳрида кўп қаватли бинолар барпо этилишида ҳукумат унинг тажрибасига таяниши керак.
Слим қурилажак объектлар зилзилабардош бўлиши учун қурилиш нормаларига ўзгартириш киритишга чақирди.
«Бу ўта аянчли фожиа бўлганига қарамай, бу ҳодиса иқтисодий фаоллик ва иш ўринларини яратишга туртки бўлади», — дейди Слим матбуот анжуманида.
У ёрдам сифатида ўз ҳисобидан 100 миллион доллардан ортиқроқ маблағ ажратишга ваъда берди. Мамлакатдаги бошқа хусусий ташкилотлар эса 22 миллион доллар маблағни хайрия қилади.
Маълумот учун, Мексикада 19 сентябрь куни юз берган 7,4 магнитудали зилзила оқибатида 369 киши ҳалок бўлди.
Изоҳ (0)