Зилзилалардан кейин кўпинча камроқ магнитудали афтершоклар кузатилади. Аммо баъзан ер қобиғининг силкинишлари кетма-кет юз беради, уларнинг содир бўлиш тезлиги ва магнитудаси муайян муддат ичида деярли ўзгармайди, ва «асосий» зилзилани ажратиб кўрсатиш мумкин бўлмайди. Бундай сейсмик ҳодисалар кетма-кетлигини «зилзилалар галаси» дейишади. Бу ҳақда National Geographic хабар бермоқда.
АҚШнинг Йеллоустоун миллий боғи ва унинг атрофларида юз берган зилзилалар галасига сейсмик фаолликнинг 50 фоизи тўғри келади. 1985 йилда бу ҳудуд ўз тарихидаги энг йирик зилзилалар галасини бошидан кечирган эди: уч ой ичида 3000 дан ортиқ силкинишлар қайд этилганди. Рекорд янгиланмаган бўлса-да, 2017 йил 12 июндан бошлаб ҳозиргача боғда ер қобиғи қарийб 2500 марта силкинди: шуларнинг 185 таси 2, 12 таси — 3 ва биттаси 4,4 магнитудали бўлди.
Сентябрнинг ўзида Йеллоустоун 115 марта силкинди. Октябрь бошидан эса сейсмик фаоллик пасаймоқда, деди олимлар, аммо унинг тўлиқ якунлангани ҳақида гапиришга ҳали эрта.
Таъкидлаш жоизки, майда зилзилалар бир вақтнинг ўзида содир бўлиши мумкин, аниқ рақамни билиш учун барча маълумотлар батафсил таҳлил қилиниши керак. 2017 йилдаги зилзилалар галаси текширилгач, у 1985 йилдаги рекорддан ўзиб кетиши мумкинлиги истисно қилинмаяпти.
Изоҳ (0)