Президент Шавкат Мирзиёев жорий йил 10—11 февраль кунлари Сурхондарё вилоятига ташрифи чоғида Термиз туманидаги «Термиз агро фиш экспорт» агрофирмасининг балиқ етиштириш ва қайта ишлаш лойиҳаси билан танишган ва вилоятда мазкур тармоқни янада ривожлантириш бўйича муҳим топшириқлар берган эди, деб хабар беради «Biznes-Daily».
Сурхондарёда балиқчилик соҳасидаги илғор хорижий тажрибаларни ўрганиш, интенсив технологияларни кенг жорий этиш, балиқ етиштиришнинг юқори технологик усулларини қўллаш, балиқ чавоқлари ишлаб чиқариш ва табиий сув ҳавзалари, сунъий кўллардан самарали фойдаланиш, соҳанинг озуқа базасини мустаҳкамлаш ҳамда тармоқ учун малакали мутахассислар тайёрлашга алоҳида эътибор қаратилмоқда.
Маълумотларга кўра, 2009 йил вилоятдаги 55 балиқчилик хўжалигида 200 тоннадан ортиқ парҳезбоп маҳсулот етиштирилган бўлса, ўтган йили 223 хўжаликда 2 минг 518 тонна балиқ овланди. Жорий йилда бу кўрсаткични 3 минг тоннага етказиш режалаштирилган.
Соҳани ривожлантириш бўйича қабул қилинган дастурда балиқ етиштиришнинг юқори технологик усулларидан фойдаланиш, балиқ маҳсулотлари ишлаб чиқаришнинг ташкилий-технологик жараёнларини тизимли ташкил этиш, балиқ чавоқларини такрор кўпайтириш ва замонавий озуқа базасини яратиш ҳамда қайта ишлашни йўлга қўйишнинг истиқболли лойиҳаларини амалга ошириш белгилаб олинган.
Изоҳ (0)