Қирғизистон Президенти Алмазбек Атамбоевнинг Ўзбекистонга давлат ташрифи доирасида Тошкентда Ўзбекистон — Қирғизистон ишбилармонлари бизнес-форуми бўлиб ўтди. Бу ҳақда О;зА хабар берди.
Унда икки мамлакатнинг савдо, саноат, иқтисодиёт, туризм индустрияси, электр энергияси, қурилиш, машинасозлик, металлургия, автомобилсозлик, электр техникаси, транспорт-логистика, қишлоқ хўжалиги, озиқ-овқат, тўқимачилик ва енгил саноат каби соҳаларга ихтисослашган вазирлик, компания ва фирмалари вакиллари иштирок этди.
Жорий йилнинг ўтган даврида Ўзбекистон — Қирғизистон ўртасидаги товар айирбошлаш ҳажми 60 фоиз ўсиб, 170 миллион долларни ташкил этди. Ўзбекистонда Қирғизистон капитали иштирокидаги 54 та корхона фаолият кўрсатмоқда. Ўз навбатида, Қирғизистонда Ўзбекистон ишбилармонлари томонидан барпо этилган 49 та корхона иш юритмоқда.
Форумда икки мамлакатнинг 500 дан зиёд давлат ва жамоат ташкилотлари раҳбарлари, фирма, компания ҳамда бизнес доираси вакиллари иштирок этди. Савдо, сармоя, энергетика ва сайёҳлик соҳаларидаги алоқаларни янада ривожлантириш, янги қўшма корхоналар ташкил этиш, машинасозлик, қурилиш ва қишлоқ хўжалиги техникалари ишлаб чиқариш борасида манфаатли келишувларга эришилди.
Хусусан, бизнес-форумда автомобилсозлик, уларга техник хизмат кўрсатиш, қишлоқ хўжалиги техникаси ишлаб чиқариш, қурилиш, қишлоқ хўжалиги, маиший техника маҳсулотлари каби қатор йўналишларда ҳамкорликка оид 17 та ҳужжат имзоланди.
Музокараларга бой ўтган форумда қиймати 200 миллион доллардан зиёд шартномалар имзоланди. Келгусида ўзаро савдо айланмаси ҳажмини 500 миллион долларга етказиш, қўшма корхоналар ташкил қилиш масалалари муҳокама қилинди.
Анжуман доирасида бўлиб ўтган ишбилармонлар иштирокидаги бевосита «B2B» учрашувларда ҳам туризм, озиқ-овқат, ИТ технологиялари, енгил саноат каби йўналишларда келишувларга эришилди.
Изоҳ (0)