Саудия Арабистони Ар-Риёд бошчилигидаги коалиция Ямандаги ҳаракатлар вақтида салкам 700 нафар боланинг ўлимига ва жароҳат олишига алоқаси борликда айблаган БМТнинг маълумотларини рад этди. Бу ҳақда подшоҳликнинг БМТдаги доимий вакили Абдулла ал-Муаллимий маълум қилди, деб хабар берди «ТАСС».
«Биз БМТ ҳисоботида келтирилган нотўғри ва чалғитувчи маълумотларни рад этамиз», — деди дипломат БМТ штаб-квартирасида бўлиб ўтган матбуот анжуманида. Унинг сўзларига кўра, Яман ҳукумати томонида кураш олиб бораётган Саудия Арабистони ва унинг иттифоқдошлари халқаро инсонпарварлик ҳуқуқларида қайд этилган ўзларининг барча мажбуриятларига собитдирлар. Шунингдек, Ал-Муаллимий коалиция мунтазам равишда мактаб ва шифохоналарни бомбардимон қилмоқда, деган маълумотларни ҳам рад этди ва бу турдаги объектлар ҳарбий-ҳаво кучларининг «тақиқланган нишонлар рўйхати»га киритилганини таъкидлади.
БМТ 6 октябрь, жума куни 2016 йилда бутун дунё бўйлаб содир бўлган қуролли можаролар оқибатида саккиз мингдан ортиқ бола ҳалок бўлгани ёки жароҳат олгани борасида ҳисобот берганди. Шундан 700 га яқин бола Саудия Арабистони бошчилигидаги коалиция томонидан Яманда амалга оширилган ҳаракатлар вақтида ҳалок бўлган ёки жароҳат олгани ҳисоботда келтириб ўтилганди.
Яманда 2014 йилдан бери ҳукумат кучлари ва исёнчи хусийлар ўртасида кураш кетмоқда. БМТ ҳисоб-китобларига кўра, 20 миллионга яқин яманлик (мамлакат аҳолисининг 70 фоизи) гуманитар ёрдам муҳтож. Яманнинг 7 миллион аҳолиси очлик ёқасида турибди ва 2 миллион бола озиқ-овқат етишмаслигидан азият чекмоқда.
Изоҳ (0)