Япония 2030 йилга келиб АЭСлардан фойдаланишдан тўлиқ воз кечиши бир неча омиллар туфайли қийин бўлади. Бу ҳақда мамлакат иқтисодиёт, савдо ва саноат вазири Хиросигэ Сэко маълум қилди, дея хабар беради «ТАСС».
«Бу реалликка тўғри келмайди. Биз атом энергиясидан фойдаланишни тўлиқ тўхтатишимиз қийин. Ҳозирда дунё ҳамжамияти парник газларининг атмосферага ташланмасини қисқартиришга уринмоқда ва Япониянинг АЭСлардан воз кечиши мазкур глобал муаммони ҳал этиш бўйича мажбуриятларини бажаришига салбий таъсир кўрсатади. Шунингдек, бу электр энергиясига тарифларнинг ошишига олиб келади, хусусий истеъмолчилар, кичик ва ўрта бизнесга зарба бериши мумкин», — деди Хиросигэ Сэко.
Вазир шу тариқа Токио губернатори ва яқинда янги «Умид партияси» раиси этиб сайланган Юрико Коикэнинг мамлакатда барча реакторлардан фойдаланишни тўхтатиш зарурлиги ҳақидаги баёнотига жавоб берди.
Маълумот учун, 2011 йилда «Фукусима-1» АЭСда авария содир бўлгунга қадар Япония энергетикаси атом энергияси улуши 30 фоизни ташкил этарди.
Изоҳ (0)