Сергели — тўққиз қаватли уйлар тумани. Тўғри, ора-сира «бўйи» тўққизга етмаган ёки ундан ўтиб кетган уйлар ҳам учраб туради. Лекин кўпчилик Сергели деганда — машина бозоридан ташқари — одатда, айнан тўққиз қаватли панел «домлар ўрмони»ни тасаввур қилади.
Туман 2016 йил сентябридан бери, таъбир жоиз бўлса, иккинчи марта худди шундай оммавий уй-жой қурилишини ўз бошидан кечирмоқда. Бир йил аввал эълон қилинган режаларга кўра, 2020 йилгача Сергелида 500 та кўп қаватли уй фойдаланишга топширилиши керак.
2017 йилги Мустақиллик байрами арафасида Сергелида қурилаётган 66 та кўп қаватли уй фойдаланишга топширилиши ваъда қилинган эди. Уларнинг аксарияти етти қаватли турар жой бинолар бўлиб, «тўққиз қаватли Сергели» учун бироз ноодатийдек кўринади (шекилли).
Шу сабаблими, 3 октябрь куни Тошкент шаҳар ҳокимлигида бўлиб ўтган матбуот анжуманида журналистлардан бири нима учун Сергелида тўққиз қаватли уйлар қурилмагани ҳақида савол берди. Тошкент шаҳар Архитектура ва қурилиш бош бошқармаси бошлиғи ўринбосари Асомиддин Тожиев тўғрисини айтди.Сергелида тўққиз қаватли уйларни қурмаганимизга сабаб — бизда кран йўқ эди. Буни очиқ тан олиш керак.Тошкент шаҳар ҳокимлиги вакилининг бу жавоби биринчи марта эшитган қулоққа ғалати туюлиши мумкин. Лекин бунда бир ибратли жиҳат борлигини ҳам қайд этмоқ зарур: Асомиддин Тожиев вазиятдан чиқиб кетиш учун гапни олиб қочмади (биринчидан), ёлғон гапирмади (иккинчидан), йўқ нарсани ваъда қилмади (учинчидан), борини айтди, ташқаридан бироз ғалати кўринса-да, мавжуд вазиятни очиқ тан олди (тўртинчидан).Асомиддин Тожиев, Тошкент шаҳар Архитектура ва қурилиш бош бошқармаси бошлиғи ўринбосари
Айтмоқчи, 2017 йил охиригача тўққиз қаватли уйларни қуришда қўл келадиган кран топилса керак — Асомиддин Тожиевнинг айтишича, 2018 йилдан Тошкентда 9, 12, 14 ва 16 қаватли монолит уйлар қурилиши бошланади.
Изоҳ (0)