Тошкент шаҳар ҳокимлигида 3 октябрь куни бўлиб ўтган матбуот анжуманида шаҳар Архитектура ва қурилиш бош бошқармаси бошлиғи ўринбосари Асомиддин Тожиев пойтахтдаги уйларнинг устки қисми нима сабабдан асосан сарғиш рангга бўялайишига тўхталиб ўтди.
«Пойтахтда қурилаётган уйларнинг устки қисмини исталган рангга бўяш мумкин. Бизда бунга рухсат бор. Бироқ, шу билан бирга, бизнинг ўз миллий рангларимиз бор. Масалан, қизил — бизнинг яшаш шароитларимизга унчалик мос эмас. Бу ранг шимолий минтақада жойлашган мамлакатларга хос», — деди Тожиев.
Асомиддин Тожиев архитектор сифатида уй ва биноларнинг қора ва қизил рангда бўлишини кўп ҳам маъқулламаслигини билдирди. Унинг фикрича, қора — мотам ранги, қизил эса эскитдан Ўзбекистон меъморчилигида қўлланилмаган.
«Биноларнинг ташқи томони у қурилаётган мамлакатга ҳам боғлиқ. Ғарбликлар бошқа рангларни маъқул кўради, бизнинг эса ўз рангларимиз бор. Шунингдек, уй ва биноларнинг ташқи томони қандай рангда бўлиши буюртмачи билан ҳам маслаҳатлашилади. Ҳамманинг ўз дунёқараши ва диди бор. Уйлар ва биноларнинг ташқи томонини ранг-баранг тарзда безатиш режада бор», — дея қўшимча қилди Асомиддин Тожиев.
Изоҳ (0)