АҚШ президенти Дональд Трамп Шимолий Кореяга босимни кучайтириш ҳақидаги директивани имзолади. Унда Миллий қуролли кучлар киберқўмондонлигидан фойдланиш ҳам кўзда тутилган, дея хабар беради «Коммерсантъ».
Ҳужжат март ойида Вашингтон томонидан Пхеньянга нисбатан сиёсат қайта кўриб чиқилганидан сўнг имзоланган, бироқ шу пайтгача бу ҳақда маълум қилинмаганди.
The Washington Post нашрига кўра, Трамп Пентагон хакерларига КХДР разведкасига қарши киберкенгликда операциялар бошлашга рухсат берди. Шу сабабли Шимолий Корея хакерлари маълум вақт интернетдан фойдаланиш имконидан маҳрум бўлди.
Шунингдек, АҚШ молия вазирлигига КХДР жисмоний ва юридик шахслари, улар билан ҳамкорлик қилаётган хорижликларга нисбатан бир томонлама санкцияларни кучайтириш топширилган.
АҚШ дипломатлари ва бошқа мансабдор шахслар чет эллик ҳамкасблари билан мулоқотлари давомида Пхеньян билан барча алоқаларни узишга даъват қилишлари лозимлиги ҳақида кўрсатма олди.
Эслатиб ўтамиз, Трамп АҚШ Давлат котиби Рекс Тиллерсонга КХДР билан музокараларга беҳуда вақт сарфламасликни маслаҳат берганди.
Изоҳ (0)