Ироқ ҳукумати Ироқ Курдистонида мустақиллик учун бўлиб ўтган референдумдан сўнг, ушбу автономияга қатновчи халқаро авиарейсларга тақиқ қўйди, деб хабар берди «Корреспондент.net».
Тақиқ 29 сентябрь куни маҳаллий вақт билан соат 18:00 да кучга кирди. Кескин чоралар қўлланилгунига қадар, Бағдод автономия расмийларидан Арбил ва Сулаймония халқаро аэропортлари устидан назоратни топширишини сўради. Бироқ курд раҳбарияти рад жавобини берди.
Айни вақтда иккита авиакомпания Арбилга парвозларини бутунлай бекор қилди: Lufthansa ҳамда Austrian Airlines. Шу билан бирга, Ироқ Курдистони ва Ироқнинг бошқа ҳудудлари орасида қатновчи ички маршрутлар Бағдод назоратида бўлиб, улар график бўйича парвозларни амалга оширмоқда.
25 сентябрь куни Ироқ Курдистонида мустақиллик референдуми бўлиб ўтган эди. Расмий маълумотларга кўра, аҳолининг 92 фоиздан ортиғи мустақилликни ёқлаб овоз берган.
Плебисцит ўтказилишига Бағдод, Анқара ва Теҳрон мутлақо қаршилик қилмоқда. Ғарб давлатлари ҳам Курдистон ҳукуматини плебисцит ўтказмасликка чақирди. АҚШ «тортишувли ҳудудларда ўтказилган референдум, айниқса, провокацион ҳисобланишини ва барқарорликка путур етказишини» маълум қилди.
Изоҳ (0)