Iroq hukumati Iroq Kurdistonida mustaqillik uchun bo‘lib o‘tgan referendumdan so‘ng, ushbu avtonomiyaga qatnovchi xalqaro aviareyslarga taqiq qo‘ydi, deb xabar berdi “Korrespondent.net”.
Taqiq 29-sentabr kuni mahalliy vaqt bilan soat 18:00 da kuchga kirdi. Keskin choralar qo‘llanilguniga qadar, Bag‘dod avtonomiya rasmiylaridan Arbil va Sulaymoniya xalqaro aeroportlari ustidan nazoratni topshirishini so‘radi. Biroq kurd rahbariyati rad javobini berdi.
Ayni vaqtda ikkita aviakompaniya Arbilga parvozlarini butunlay bekor qildi: Lufthansa hamda Austrian Airlines. Shu bilan birga, Iroq Kurdistoni va Iroqning boshqa hududlari orasida qatnovchi ichki marshrutlar Bag‘dod nazoratida bo‘lib, ular grafik bo‘yicha parvozlarni amalga oshirmoqda.
25-sentabr kuni Iroq Kurdistonida mustaqillik referendumi bo‘lib o‘tgan edi. Rasmiy ma’lumotlarga ko‘ra, aholining 92 foizdan ortig‘i mustaqillikni yoqlab ovoz bergan.
Plebissit o‘tkazilishiga Bag‘dod, Anqara va Tehron mutlaqo qarshilik qilmoqda. G‘arb davlatlari ham Kurdiston hukumatini plebissit o‘tkazmaslikka chaqirdi. AQSh “tortishuvli hududlarda o‘tkazilgan referendum, ayniqsa, provokatsion hisoblanishini va barqarorlikka putur yetkazishini” ma’lum qildi.
Izoh (0)