Буюк Британия парламенти Лордлар палатаси аъзоси, барон Муҳаммад Илтаф Шайх «Дарё» интернет-нашрида 25 сентябрь куни эълон қилинган хабарга муносабат билдирди (лорднинг муносабатидан сўнг, 25 сентябрдаги хабар таҳрирланди).
Хабарда лорд Шайхнинг шахсий ҳаётига ҳам тўхталиб ўтилган бўлиб, унда, жумладан, The Daily Mail нашрига асосланган ҳолда, лорд ўз вақтида асли самарқандлик Гули Мурадова билан унаштируви учун 1 килограмм тилла миқдорида қалин пули бергани ҳақида гап-сўзлар тарқалгани қайд этилган эди.
Лорд Шайхнинг вакиллари «Дарё» интернет-нашри таҳририяти билан боғланиб, хабардаги қалин пули билан боғлиқ таъкид ҳақиқатга тўғри келмаслигини маълум қилди. Шунингдек, лорднинг бу масала бўйича баёноти «Дарё»га тақдим этилди.
Мен Ўзбекистонга Буюк Британия ва Ўзбекистон ўртасидаги иқтисодий, таълим ва сиёсий алоқаларни мустаҳкамлаш учун келганман.Мен Ўзбекистон ҳамда ушбу тарихий ва ажойиб мамлакат халқининг дўстиман. Самарқандлик Гули хоним билан оила қурганимдан сўнг, бу муносабатлар янада мустаҳкамланди. Ўзбекистонга ташрифим давомида Гули Мурадова менга ҳамроҳлик қилмоқда.
Эътиборингизга шуни маълум қилишим лозимки, нашрингиздаги хабарда тилга олиб ўтилган — мен Гули ёки унинг оиласига бир килограмм олтин миқдорида пул берганим ҳақидаги таъкид мутлақо ёлғон ва ҳақиқатга мос келмайди.
Унаштирувимиз вақтида мен пул ёки тилла бермаганман. Бу менинг қўл остимда ишлаган собиқ ходим томонидан тарқатилган ёвуз уйдирмадир. Хабар юзасидан тузатиш берсангиз ва ҳақиқатни баён қилсангиз, миннатдор бўлардим.
Лорд Муҳаммад Илтаф Шайх, барон, Буюк Британия парламенти Лордлар палатаси аъзоси
Изоҳ (0)