Тошкент шаҳар ҳокимининг ўринбосари Шуҳрат Аброров дайди ҳайвонларни тутиш хизматлари фаолиятини тўхтатишга кўрсатма берди. Бу ҳақда жониворларни ҳимоя қилиш гуруҳи вакили Карина Напасова маълум қилди, дея хабар беради «Kommersant.uz».
Мазкур масалада муҳокамалар ўтказилмагунча тутиш бригадалари ишламайди. 28 сентябрь, чоршанба куни ҳокимликда жониворлар ҳимоячилари гуруҳи, шунингдек, бошқа манфаатдор томонлар билан учрашув ўтказилади.
Ҳокимлик ва ҳимоячилар ҳозирда жониворларни тутиш билан кимдир шуғулланаётган бўлса, бу махсус бригадалар эмаслигига фуқаролар эътиборини қаратмоқда. Бунга гувоҳ бўлганлар 102 рақамига қўнғироқ қилиши ёки «Mehr va Oqibat» жамиятига мурожаат этиши мумкин.
«Биз ҳокимлик мулоқот учун очиқ эканлигидан мамнунмиз», — таъкидлади Карина Напасова. Муҳокамаларда иштирок этишга экологлар, Соғлиқни сақлаш вазирлиги, ветеринар хизматлари, тутиш бригадалари вакилларини жалб этиш режалаштирилган.
Тошкент шаҳрида юз берган эгаси йўқ жониворларга нисбатан зўравонлик ҳаракатлари ҳақидаги хабарлар Facebook’да ва Telegram мессенжерида ҳафта бошидан бери мунтазам пайдо бўлмоқда. «Mehr va Oqibat» ҳайвонларни ҳимоя қилиш жамияти 26 сентябрь куни Тошкентнинг Чилонзор туманида итнинг отиб ташланишига гувоҳ бўлган боланинг онасидан тушган ариза ҳақида маълум қилди.
Тошкент шаҳар ҳокимлиги 23 сентябрь куни дайди ҳайвонларни тутиш бўйича ҳаракатларни кучайтиришини эълон қилган эди.
Изоҳ (0)