Россиянинг «ВИМ-Авиа» авиакомпанияси барча чартер рейсларни бекор қилди. У камида 80 минг йўловчини ташиши керак эди

Россиянинг «ВИМ-Авиа» авиакомпанияси барча чартер рейсларни бекор қилди, деб ёзади Meduza. «Росавиация»га кўра, у «ВИМ-Авиа»ни «Узоқ Шарқ шаҳарларига ижтимоий муҳим йўналишлар»га алмаштириш ҳақида Россия авиакомпаниялари билан музокаралар олиб бормоқда.

Авиакомпания эгаларидан бири Рашид Мурсекаев айтишича, компанияда ўз ишини давом эттириш учун маблағ йўқ. «Айланма маблағлар тугаб битди, молиялаштириш тўхтатилди. Аэропортларда хизмат кўрсатиш тўхтатиб қўйилди. Авиакомпания парвозларни амалга ошира олмагани сабабли, ташқи аксилинқироз бошқармасини жорий қилиш имкониятини ўрганмоқдамиз», — деди у.

Россия сайёҳлик операторлари ассоциацияси маълумотларига кўра, «ВИМ-Авиа» октябрь ўрталаригача камида 80 минг йўловчини ташиши керак эди.

Нашр эслатишича, аввалроқ Тергов қўмитаси «ВИМ-Авиа» раҳбариятига қарши жиноят иши очганини эълон қилган эди. Компания раҳбарияти йўловчиларни таший олмаслигини билиб туриб, чипталарни сотган.