Илон Маск Марсга учадиган сайёралараро космик кеманинг «парвози»ни намойиш этди (видео)

Америкалик бизнесмен ва SpaceX асосчиси Илон Маск сайёралараро космик кеманинг Марсга парвози ҳамда унинг иши моделлаштирилган видеони намойиш этди. Видеоролик Маскнинг Instagram’даги саҳифасига жойлаштирилди, деб хабар берди «РБК».

Илон Маск намойиш этган қисқа видеоларда космик кеманинг Ер сатҳидан учиб Марсга қўниши тасвирланган. Видеодаги ушбу кеманинг саёҳати Марс иқлимининг ўзгариши билан якунланади — унинг иқлими Ерникига ўхшаб қолади.

Бундан ташқари, Маскнинг сўзларига кўра, компания яқин вақтлар ичида Rocket конструкциясининг янги версияси тасвирланган видеони тақдим этади. «Янги дизайннинг айрим жиҳатлари ва унинг қўлланилиши кутилмаган бўлади», — дея ваъда берди бизнесмен.

Аввалроқ, Маск SpaceX компанияси томонидан яратилган янги скафандрнинг илк суратларини намойиш этганди.