Германияда Бундестагга сайловлар бошланди

Германияда парламент сайловлари куни сайлов участкалари очилди. Бу ҳақда Reuters хабар бермоқда.

Натижалари янги ҳукумат ва янги канцлер номини аниқлаб берадиган овоз бериш жараёни Тошкент вақти билан 21:00 га қадар — 18 соат давом этади. Meduza’нинг ёзишича, сайлов тугаши билан унинг дастлабки натижалари эълон қилинади (2013 йилги сайловда дастлабки натижалари 15 дақиқа ичида эълон қилинган эди).

Сайлов арафасида ўтказилган сўнгги ижтимоий сўровлар сайловчиларнинг 35 фоизи Ангела Меркель етакчилигидаги ХДИ/ХСИ альянси учун овоз беришга, ўз-ўзидан, Меркель хонимни кетма-кет тўртинчи бор канцлер бўлишини таъминлашга тайёрлигини кўрсатган.

Ижтимоий сўров натижаларига кўра, ХДИ/ХСИнинг асосий рақобатчилари — Германия социал-демократик партияси (ГСДП) сайловчиларнинг 22 фоиз, «Германия учун муқобил йўл» фирқаси эса 11 фоиз овоз олиши кутилмоқда. Кейинги ўринларни «Сўллар», «Эркин демократлар» ва «Яшиллар» банд этган.

2013 йили бўлиб ўтган сўнгги парламент сайловларида ХДИ/ХСИ блоки 41,5 фоиз овоз олиб, Бундестагдаги 309 курсини банд этган эди. Улар ГСДП билан коалиция ташкил этиб, умумий ҳисобда 502 мандатга эга бўлганди.

Канцлерни сайлаш учун депутатларнинг шунчаки кўпчилик овозини қўлга киритиш кифоя.