Қадимги замонларда бақлажон заҳарли ва ақлдан оздирувчи сабзавот ҳисобланган. Аста-секинлик билан бақлажонлардан ҳамма айбловлар олиб ташланди ва улар кўпчилик одамларнинг таомномасидан ўрин олди.
Агар шу пайтгача бақлажонлар сизнинг совутгичингизнинг севимли меҳмонлари ҳисобланмаса, буни тезликда ўзгартириш керак!
— Бақлажонлар микроэлементлар — марганец, темир ва рух моддаларига жуда бой, шунинг учун бу сабзавотни камқонликда истеъмол қилиш тавсия қилинади. Унинг таркибидаги B гуруҳ витаминлари асаб тизимини мустаҳкамлайди, депрессия ва уйқусизлик билан курашишда ёрдам беради.
— Бақлажон — озувчилар учун ажойиб озиқ-овқат ҳисобланади. Сабзавот таркибидаги кўп миқдордаги клетчатка организмдан токсинларни ва ҳазм бўлмаган овқатларни чиқариш хусусиятига эга.
Тайёрлаш усулини ҳисобга олиш муҳим: қовуришда бақлажон парҳезлик хусусиятини йўқотади, чунки у ёғни ўзига яхши сингдириб олади. Лекин, тайёрлаш олдидан тўғралган сабзавотларни совуқ сувда ивитиш йўли билан бунинг олдини олиш мумкин.
— Бақлажон уруғларининг таркибида никотин кислотаси мавжуд бўлгани учун унинг мазаси бироз тахирроқдир. Лекин бақлажон соғлиққа зарар келтиради деб ташвишланмасангиз ҳам бўлади: битта сигарета таркибидаги никотин миқдорига эга бўлиш учун 10 килограммга яқин бақлажон ейиш керак!
— Бақлажонни деярли ҳамма озиқ-овқатлар билан биргаликда тайёрлаш мумкин. У гўштли, бошқа сабзавотлар қўшилган ва ҳатто ачитилган сут маҳсулотлари: пишлоқ, творог ва ёгуртли таомларни ҳам ажойиб тарзда тўлдиради.
Бу сабзавотни узоқ вақт сақлаш мумкин. Лекин уни полиэтилен ичида эмас, балки қоғоз халтада сақлаш керак — шунда у «нафас олиш» имкониятига эга бўлади, узоқ вақтгача ўзининг янгилигини ва фойдали хусусиятларини сақлаб қолади.
Манба: «Passion.ru»
Изоҳ (0)