Мьянманинг Ракхайн штатида 25 августдан бошлаб зўравонлик ҳолатлари бошлангани муносабати билан, 270 мингга яқин роҳинжа элатига мансуб қочоқлар Мьянмадан Бангладешга қочиб ўтди. Бу ҳақда БМТнинг Қочоқлар ишлари бўйича олий комиссари расмий вакили Даня Аслам Хон маълум қилди.
«Сўнгги икки ҳафта ичида, ҳисоб-китобларга кўра, 270 мингга яқин қочоқ роҳинжалар хавфсизлик истаб Бангладешга ўтган», — дея Аслам Хоннинг сўзларидан иқтибос келтирмоқда «ТАСС».
Аслам Хоннинг қайд этишича, роҳинжалар — фуқаролиги йўқ, ислом динига эътиқод қилувчи ва ўн йиллар давомида таҳқирловга дучор бўлган ўта қашшоқликда кун кечирувчи миллий озчиликдир.
БМТ вакили қочоқларнинг ўз уй-жойларини ташлаб чиқишга мажбур қилган зўравонлик ҳолатларининг чуқур сабабларини аниқлаб, уларни бартараф этишга чақирди.
Даня Аслам Хоннинг қайд этишича, Кокс-Базардаги иккита қочоқлар лагери тўлиб бўлган ва янги келаётганларни жойлаштириш учун «бошқа ҳудуд ва бошпаналар керак».
Ҳозирча Бангладешдаги қочоқлар лагерига 70 минг нафар роҳинжа элатига мансуб қочоқлар жойлаштирилгани айтилмоқда.
Изоҳ (0)