Янгийўл тумани ҳудудида олти нафар шахснинг ўлимига сабаб бўлган йирик йўл-транспорт ҳодисаси содир бўлди. Бу ҳақда Тошкент вилояти прокуратураси расмий сайтида хабар берилди.
6 сентябрь куни Тошкент—Термиз автомобиль йўлининг 832-километрида Nexia автомашинаси ҳайдовчиси MAN юк машинаси билан тўқнашув содир қилган. Натижада юк машинаси йўлнинг қарама-қарши йўналишига чиқиб кетиб, яна иккита Nexia автомашиналари билан тўқнашган.
ЙТҲ натижасида олти нафар шахс, шу жумладан бир нафар вояга етмаган шахс воқеа жойида вафот этган. Яна олти нафар шахс турли тан жароҳатлари олиб, шифохонага жойлаштирилган.
Воқеа жойида фавқулодда хизматлар ва ҳуқуқни муҳофаза қилувчи органлар ишлади.
Мазкур ҳолат юзасидан Жиноят кодексининг 266-моддаси (транспорт воситалари ҳаракати ва улардан фойдаланиш хавфсизлиги қоидаларини бузиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)