«Бу — ДТМ ваколатидаги масала». Олий ва ўрта махсус таълим вазирлиги ОТМларга кириш тест имтиҳонларидаги «шубҳали тасодифлар» юзасидан чора кўрмайди

Ўзбекистон Олий ва ўрта махсус таълим вазирлиги мамлакатнинг бир қатор етакчи олий таълим муассасаларига кириш тест имтиҳонлари вақтида рўй берган «шубҳали тасодифлар» — танланган абитуриентларни ўқишга киритиш бўйича «махсус гуруҳлар» ишлагани юзасидан чора кўрмайди. Бу ҳақда вазирлик ахборот хизмати раҳбари Фарҳод Бабашев «Дарё»га маълум қилди.

Вазирлик вакилига кўра, тест имтиҳонлари — Давлат тест маркази ваколатидаги масала, вазирликнинг вазифаси эса — ўқишга киргани ДТМ томонидан расман тасдиқланган шахсларни ўқитишдир.

Олий ва ўрта махсус таълим вазирлиги томонидан чора кўрилмайди. Тест имтиҳонлари — Давлат тест маркази ваколатидаги масала. Бу масала бўйича барча саволларни Давлат тест марказига бериш керак.

Вазирлик ўқишга кирган талабаларни ўқитиб беради, абитуриентларни тест имтиҳонларига тайёрлашга масъул. Лекин 1 августдаги жараён, тест имтиҳонлари натижалари — бари Давлат тест маркази ваколатида.

Фарҳод Бабашев, Олий ва ўрта махсус таълим вазирлиги Ахборот хизмати раҳбари

Аввалроқ Тошкент давлат иқтисодиёт университети (ТДИУ, «Нархоз»), Ўзбекистон миллий университети (ЎзМУ), Тошкент педиатрия тиббиёт институти (ТошПТИ, «САМПИ») ва Тошкент молия институти (ТМИ)га кириш тест имтиҳонлари вақтида «шубҳали тасодифлар» юз бергани ҳақида хабарлар берилган эди.ЎзМУдаги ҳолат юзасидан университет ректори Авазжон Мараҳимов, ТМИдаги вазият бўйича олийгоҳ раҳбарияти муносабат билдириб, улар бундай «шубҳали тасодифлар»га қарши кураш олиб бораётгани, бироқ абитуриентларни ўқишга киритиш бўйича «кўчадаги саноат» кучли эканини таъкидлаган эди.ЎзМУ ректори сентябрдан шубҳали тарзда ўқишга кирганликда гумон қилинаётганларга нисбатан талаб кучайтирилишига ваъда берган эди, ТМИ раҳбарияти эса умуман тест имтиҳонларини ислоҳ қилиш зарурлигини қайд этган эди. Олий Мажлис Қонунчилик палатаси депутати Абдуқодир Тошқулов эса «Нархоз»даги вазият кўп йиллардан бери шундай эканини айтиб, университетни танқид қилган эди.Айни вақтда, ТДИУ ва ТошПТИ раҳбариятлари, ДТМ маъмурияти ва бошқа тегишли назорат органлари ҳозирча бу вазият бўйича изоҳ ё тушунтириш берганича йўқ. Жамоатчилик эса мазкур шубҳали ҳолатлар юзасидан прокуратура томонидан текширув олиб борилишини, шубҳа тушган йўналишлар бўйича тест имтиҳонлари натижалари бекор қилинишини талаб этган эди.