Ўнинчи фарзанд. Ўтмиши фожиали кўп фарзандли оилада яна бир меҳмон

Тақдири осон кечмаган омсклик Антон Кудрявцев оиласида қиз фарзанд дунёга келди. У оиланинг ўнинчи фарзанди, деб ёзади «Аргументи и факти».

Омсклик Людмила қиз фарзандни дунёга келтирди. Қизалоқ 3,940 килограмм, 56 сантиметр бўлиб дунёга келди. Унга Ева деб исм беришди. Янгиликдан хабар топган бахтли ота у билан ижтимоий тармоқларда бўлишди. Албатта, фарзанднинг дунёга келиши — ҳар доим яхши янгилик, бироқ бу сафар у ўзига хос вазият.

Антон биринчи рафиқаси Аня билан бахтли ҳаёт кечираётган эди. Улар уч нафар ўғлини тарбия қилаётганда Аня уч эгизакка ҳомиладор бўлди. Афсуски, Соня, Даша ва Поли тимсолидаги чексиз бахт улкан қайғуга айланди: шифокорлар Аняда онкологик хасталикни қайд этди. Касаллик ҳомиладорлик давридаёқ ривожлана бошлади, бироқ ўшанда шифокорлар болалар ҳақида ўйлашни маслаҳат берди. Туғуруқдан сўнг эса касалликни даволашнинг иложи йўқ эди...

Бундай ташвишга дуч келган кўп фарзандли оила ҳақида эшитган ижтимоий тармоқлардаги одамлар қўллаб-қувватлаш гуруҳларини ташкил этиб, даволаш учун пул юборишди. Шифохоналарда эса Кудрявцевларга пул сарфламасликни маслаҳат беришди. Исроиллик шифокорлар ҳам ёрдам бера олмади.

2015 йилнинг 9 майида Аня дунёдан кўз юмди. 30 ёшли турмуш ўртоғи олти нафар бола билан ёлғиз қолди, улардан уч нафари ҳали жуда кичкина эди.

«Яхши, сен ҳали уйланишинг мумкин», — деган эди Аня ўлимидан бироз аввал.

Антон ҳақида телекўрсатув эфирга чиққандан сўнг аёллар уни мактублар билан кўмиб ташлади. Чет элда яшашни таклиф қилишди, уни қаҳрамон деб аташди. Мактублар оқими бироз камайгандан кейингина Антон электрон почтасида Людмиланинг мактубини кўриб қолди. У ҳеч нарса сўрамаган, ваъда бермаган, шунчаки ёрдамини таклиф қилган эди...

«Аня вафот этгандан сўнг бир йил ўтди, Люда билан ёзиша бошладик. Аняга хиёнат қилдим деб ўйламайман. Ахир уни ташлаб кетганим йўқ, болаларни ҳам», — дея хотирлайди Антон.

«Ўғлимни ёлғиз катта қилаётган эдим, онам менга ёрдам берар эди. Антон ҳақида эшитганимда ҳақиқий оилани истаётганимни тушундим. Онам, албатта, қўрқиб кетди ва ‘Ақлдан озибсан! Ахир бу катта масъулият!’ дея бақирди», — дейди Людмила.

Бироқ Люда танлаб бўлган эди.

Бир йил аввал Антон ва Людмила никоҳдан ўтди ва оила қурди. Тўй саёҳатидан қайтгандан сўнг онаси ОИТВдан вафот этган, отаси қамоққа тушган икки нафар болакайни қарамоғига олди.

Ҳар қандай кўп фарзандли оилада бўлгани каби Кудрявцевларда ҳам муаммолар етарли. Бироқ улар ёш, фаол ва соғлом. Қийинчиликлар олдида таслим бўлмасдан, шунчаки уларни енгиб ўтади. Маслаҳатлашиб. Ишонч ва муҳаббат билан...

Люда ҳаммага етадиган кўп овқат пиширишни ўрганди. Болаларнинг ўз мева, олмалари бўлиши учун боғ билан шуғулланишга қарор қилди.

«Ҳаётимда мазмун пайдо бўлди. Мен энди ҳақиқатан бахтлиман», — дейди у.

Энди эса Ева дунёга келди. Яқинлари уларни табриклаб, чақалоққа соғлик тилади. Баъзилар эса чиндан ҳайратга тушди. Ахир Ева оиладаги ўнинчи фарзанд. Бу эса ҳазил эмас.

Людмила болалигида 13 нафар боланинг онаси бўлишни ва саройда яшашни орзу қилган эди. Хўш, ўн нафари аллақачон бор. Буёғи унча кўп қолмади!