Тошкент шаҳар Ички ишлар бош бошқармаси Мустақиллик шоҳ кўчаси ва Оққўрғон (Дархон) кўчалари кесишмасида 5 сентябрь куни юз берган ноодатий йўл-транспорт ҳодисаси юзасидан баёнот берди.
Мавзуга доир:Тирбанд чорраҳа, ўқ овозлари, ўғирланган Spark. Тошкентда ноодатий ЙТҲ юз берди (видео)
Аввалроқ Мустақиллик — Оққўрғон кўчалари чорраҳасида Spark русумли автомобиль беш машинани уриб, ўзига йўл очиб, қочиб кетгани, ички ишлар идоралари ходимлари вазият гувоҳига айлангани ҳақида хабар берилган эди. Ҳодиса жойидан олинган видеода ўқ овозларини эшитиш мумкин.
ИИББ ахборотида қайд этилишича, 4 сентябрь куни тахминан 13:30 ларда номаълум шахс Учтепа туманида қаровсиз қолдирилган Spark автомобилини олиб қочган. Ҳолат юзасидан Учтепа тумани ИИБ ҳузуридаги Тергов бўлими томонидан «транспорт воситасини олиб қочиш» аломатлари билан жиноят иши қўзғатилган.
«Жиноят иши юзасидан олиб борилган тезкор қидирув натижаларига кўра, мазкур автомашина фуқаролар, йўловчилар ва ҳайдовчиларга зарар етказмаслиги мақсадида қуролдан фойдаланган ҳолда ҳаракатланишига чек қўйилиб, тўхтатилди», — дейилади ИИББ ахборотида.
Автомобиль айнан қаерда тўхтатилганига, ҳуқуқбузарлар қўлга олинган-олинмаганига расмий ахборотда аниқлик киритилмаган. «Газета.uz» маълумотларига кўра, ўғирланган Spark орқа бампери тушиб кетган ва олд шиналаридан бири пусайган ҳолда Боткин қабристони яқинида топилган.
Изоҳ (0)