Йўл интизомни ёқтиради. Интизомли ҳайдовчиларнинг эса йўллари ҳамиша равон бўлади. Аммо афсуски, сўнгги вақтларда айрим ҳайдовчилар, айниқса, юк автомобиллари ҳайдовчилари томонидан дам олмасдан, об-ҳаво шароитларини инобатга олмасдан, йўл ҳаракати хавфсизлиги талабларини қўпол равишда бузиб, тунги вақтда узоқ муддат транспорт воситасини бошқариш каби масъулиятсизликлар оғир оқибатли йўл-транспорт ҳодисаларини келтириб чиқармоқда, деб хабар берди ИИВ матбуот хизмати.
2017 йил 24 август куни соат 02:00 ларда, Қашқадарё вилояти Қарши шаҳри ҳудудида, I.А. исмли ҳайдовчи «ГАЗ-53» русумли юк автомобилини бошқараётиб, шу йўналишда йўлнинг ўнг томонида тўхтаб турган «ЗИЛ ММЗ-554» русумли юк автомобилини орқа чап томонига урилиб, тўқнашув содир этган.
2017 йил 25 август куни соат 19:45 ларда, Жиззах вилояти Пахтакор тумани ҳудудида Р.Ш. исмли ҳайдовчи шахсий Nexia русумли автомобилини бошқараётиб, шу йўналиш бўйлаб олдинда орқага қайрилмоқчи бўлиб тўхтаб турган бухоролик В.О. бошқарувидаги «ЗИЛ-130» русумли юк автомобилини орқа томонига урилиб тўқнашув содир этган.
2017 йил 27 август куни соат 07:00 ларда, Қашқадарё вилояти Деҳқонобод тумани ҳудудида, Д.Б. исмли ҳайдовчи шахсий Isuzu русумли юк автомобилини бошқараётиб, қаршисидан ҳаракатланиб келаётган, сурхондарёлик ҳайдовчи бошқараётган Nexia русумли автомобилини йўлига чиқиб тўқнашув содир этган.
2017 йил 29 август куни соат 03:30 ларда, Самарқанд вилоятида Б.Ш. исмли ҳайдовчи «КамАЗ-5410» русумли юк автомобилини бошқараётиб, бошқарувни йўқотиб йўлнинг ўрта қисмига ўрнатилган бетон тўсиққа урилиб, тўхтаган вақтида, шу йўналиш бўйлаб орқасидан ҳаракатланиб келаётган, ҳайдовчи ўзининг Damas русумли автомобили билан ушбу юк автомобилини орқа томонига урилиб тўқнашув содир этган.
Йўл ҳаракати хавфсизлиги бош бошқармаси Республика ҳудудида йўл ҳаракати хавфсизлигини таъминлаш ҳамда юқоридаги каби турли бахтсиз ҳолатларнинг олдини олиш мақсадида ҳайдовчилардан йўлда ҳаракатланиш қоидаларига тўлиқ ва қатъий риоя қилишларини сўрамоқда.
Изоҳ (0)