Бокс бўйича Ўзбекистон терма жамоаси Германиянинг Гамбург шаҳрида бўлиб ўтган Жаҳон Чемпионатини 1 та олтин, 3 та кумуш ва 2 та бронза медали билан якунлади ва умумжамоа ҳисобида Кубадан кейин 2-ўринни қўлга киритди.
Рио—2016 Олимпиадасида шунинг акси кузатилиб, Ўзбекистон делегацияси пешқадамликка эришган, Кубага эса 2-ўрин насиб қилганди.
Ўзбекистон боксчиларидан фақатгина Шаҳрам Ғиёсов кубалик рақиби устидан зафар қучишга муваффақ бўлди. Бу билан Шаҳрам WSB таснифидаги мағлубияти учун реванш олгандек бўлди.
Қозоғистон термаси ҳам Ўзбекистон сингари 1 та олтин медалга эга чиқди. Бироқ уларда кумуш медаллар сони 1 тага камроқ.
Ўзбекистон терма жамоаси Қатарда ўтган сўнгги ЖЧда 3 та кумуш ва 3 та бронза билан умумжамоа ҳисобида 7-ўринни қўлга киритган бўлиб, ўшанда кубаликлар 4 та олтин билан пешқадам бўлган, мос равишда Россия 2 та, Озарбайжон, Ирландия, Франция ва Марокаш 1 тадан олтинга эга чиққанди. Қозоғистонлик спортчилар эса бор-йўғи 2 та кумуш билан Ўзбекистондан кейинги 8-поғонадан жой олганди.
Изоҳ (0)