АҚШ президенти Дональд Трампнинг компанияси сайловолди пойгасининг бошида Москвада Trump Tower осмонўпар биносини қуришни режалаштирган. Бу ҳақда The Washington Post’га таяниб, «Корреспондент.net» хабар берди.
Келиб чиқиши россиялик бўлган Феликс Сатер 2015 йилнинг ноябридаги мактубида қурилишни бошлаш учун Трампни Москвага таклиф қилган. Бундан ташқари Россия президенти Владимир Путин билан ҳам учрашув амалга ошиши мумкин бўлган.
Шунингдек, у Trump Organization вице-президенти Майкл Коэнга Трамп тез кунларда бир вақтнинг ўзида кўчмас мулк тарихидаги энг улкан лойиҳани ҳамда президентлик сайловидаги ғалабасини нишонлашини ёзиб юборган.
Қурилиш режасидан хабардор бўлган WP манбасининг маълумотларига кўра, компания ва инвесторлар розилик хатини ёзишганига қарамай, Трамп Россия пойтахтига ташриф буюрмаган.
Шу билан бирга Оқ уй вакили ушбу маълумотга изоҳ беришдан бош тортган.
Изоҳ (0)