Бухоро шаҳар ИИБга навоийлик С.Ҳамроева ариза орқали мурожаат қилиб, Бухоро шаҳри Марказий бозоридаги 265-сонли савдо дўкони олдида ичида пуллари бўлган сумкасини ўғирлаб кетишгани ҳақида маълум қилган, деб хабар берди вилоят ИИБ матбуот хизмати.
Аёлнинг сумкасида 800 АҚШ доллари, 600 минг сўм нақд пул, банк пластик карточкаси ва турмуш ўртоғи Комилжон Қораев тегишли ҳисобида 40 минг сўм бўлган пластик карточка, фуқаролик паспорти, жами баҳоси 200 минг сўмлик 2 дона аёллар кумуш узуги, баҳоси 150 минг сўмлик бир жуфт аёллар кумуш сирғаси, баҳоси 100 минг сўмлик бир дона аёллар кумуш занжири ҳамда 50 минг сўмлик аёллар ҳамёни бўлган.
Ички ишлар идоралари ходимлари томонидан олиб борилган тезкор тадбирлар натижасида, Бухоро шаҳрида яшовчи опа-сингиллар Гулноз, Дилбар ва Дилрабо Ражабовалар Бухоро шаҳридаги Марказий бозорда навбатдаги «киссавурлик» жиноятини амалга оширишлари пайтида далилий ашёлар билан қўлга олинди. Ҳозирда уларга нисбатан «қамоқ» эҳтиёт чораси қўлланилиб, тергов ҳаракатлари олиб борилмоқда.
Изоҳ (0)