Хитойдаги Ўзбекистон элчихонасида Ўзбекистон Ёшлар иттифоқи Марказий Кенгаши раиси Қаҳрамон Қуронбоев Хитойда таҳсил олаётган ва меҳнат фаолиятини юритаётган ўзбекистонлик ёшлар билан очиқ мулоқот ўтказди. Бу ҳақда Ўзбекистон Ёшлар иттифоқининг Facebook’даги саҳифасида хабар берилди.
Суҳбатда Қаҳрамон Қуронбоев бошчилигидаги Ўзбекистон делегацияси, Ўзбекистоннинг Пекиндаги элчиси Бахтиёр Саидов ҳамда кўп сонли ўзбекистонлик ёшлар иштирок этди.
Очиқ мулоқот давомида Хитойдаги 2700 нафардан ортиқ ёшларнинг манфаатларини ҳимоя қилиш, қолаверса, Ўзбекистонда ёшларга оид давлат сиёсатига оид янгиликлар билан ўзбекистонлик ёшларни бохабар қилиш мақсадида «Ахборот етказиш маркази» ташкил этилди.
Очиқ мулоқот давомида ёшлар ўзларини қизиқтирган барча саволларга жавоб олди. Шундан сўнг, бир овоз билан Ўзбекистон Ёшлар иттифоқининг Пекиндаги Бошланғич ташкилоти етакчилигига Акмал Иброҳимов сайланди. Бошланғич ташкилот етакчисининг АКТ ва ахборотни жамоатчиликка етказиш бўйича ўринбосари сифатида эса Озода Аминова фаолият юритадиган бўлди.
Бу хорижда очилган биринчи Ўзбекистон Ёшлар иттифоқининг Бошланғич ташкилоти, дейилади хабарда. Кейинчалик барча хорижий давлатларда таҳсил олаётган ва ишлаётган Ўзбекистон ёшларининг манфаатларини ҳимоя қилиш мақсадида яна кўпгина ривожланган давлатларда ҳам бошланғич ташкилотлари тузилиши кўзда тутилган.
Изоҳ (0)