Тошкент шаҳар ИИББ томонидан маълум қилинишича, Чилонзор туман ИИБ ҳузуридаги тергов бўлими томонидан одам савдоси жинояти бўйича тергов ҳаракатлари олиб борилмоқда.
Хабар берилишича, 2017 йил 22 август куни Чилонзор туман ИИБга фуқаро Наима Эркинова ариза билан мурожаат қилган. Аризага кўра, ёши 40 — 45 ларда бўлган Гулшан исмли аёл унинг Маҳфуза ва Арофат исмли танишларини Қозоғистон орқали Туркияга фоҳишалик билан шуғулланиш учун юбормоқчи бўлган. Мазкур шахсга нисбатан қонуний чора кўришни сўраган.
Ушбу ариза асосида, шу куни Тошкент шаҳар ИИББ ва Чилонзор туман ИИБ ходимлари томонидан жиноятчини қўлга олиш борасида тезкор тадбир режалаштирган.
Тошкент вилояти Зангиота туманида жойлашган «Ғишт-кўприк» ЙПХ масканида Гулшан Рўзимуродова фуқаролар Маҳфуза Султонова ва Арофат Раҳматовани Қозоғистон Республикаси орқали Туркияга юбормоқчи бўлган вақтида қўлга олинган.
Мазкур ҳолат юзасидан Гулшан Рўзимуродовага нисбатан жиноят иши қўзғатилган. Тергов даврида у Маҳфуза Султанова ва Арофат Раҳматовага фоҳишалик қилиш орқали мўмай даромад орттириши, яшаш шарт-шароитлари яхши эканлигини ваъда қилиб, уларни Қозоғистон ҳудуди орқали Туркиянинг Истанбул шаҳрига юбормоқчи бўлганлиги аниқланди.
Дастлабки тергов ҳаракатлари давомида мазкур жиноятни содир этганликда Гулшан Рўзимуродованинг айби тўлиқ исботланиб, унга Ўзбекистон Республикаси Жиноят Кодексининг 135-моддаси 2-қисми «б» банди билан айблов эълон қилинди ва жиноятнинг оғирлилик даражасини инобатга олган ҳолда унга нисбатан «қамоққа олиш» тарзидаги эҳтиёт чораси қўлланилган.
Ҳозирда жиноят иши бўйича дастлабки тергов ҳаракатлари давом эттирилиб, Гулшан Рўзимуродованинг бошқа жиноятларга алоқадорлиги текширилмоқда.
Жабрланувчиларнинг анкета маълумотлари ўзгартирилган бўлиб, фамилияси ва исмининг ҳар қандай ўхшашлиги тасодифий характерга эга.
Изоҳ (0)