АҚШ президенти Дональд Трампнинг ёрдамчиси ўринбосари Себастьян Горка маъмуриятнинг ҳозирги, жумладан, ташқи сиёсат масалаларидаги нуқтаи назари билан келишмагани учун истеъфо берди. Бу ҳақда Горканинг шу ҳақдаги мактубига таяниб, The Federalist нашри маълум қилди, дея хабар беради «ТАСС».
«Яқинда юз берган ҳодисаларни инобатга олиб, Оқ уйда президент ваъдаларини қўллаб-қувватламайдиган кучларнинг қўли баланд келаётганига гувоҳ бўлдим. Жаноб президент, шундан сўнг Сизни ёқлашнинг энг яхши ва самарали усули буни Оқ уйдан ташқарида амалга ошириш бўлиб қолди. Бу айниқса шу ҳафтада Афғонистон бўйича нутқингизни ўқиганимдан сўнг яққол аён бўлди», — дейилади Горканинг мактубида.
Горканинг истеъфосини Оқ уй ҳам тасдиқлади. Унинг маъмуриятнинг нуфузли аъзоси бўлгани ва ўтган ҳафтада ишдан четлатилган Оқ уй собиқ бош сиёсий стратеги Стив Беннон қарашларини ёқлагани билдирилмоқда.
Изоҳ (0)