Хитой БМТ Хавфсизлик кенгашининг резолюциясини бажариш доирасида КХДР фуқаролари ва компанияларига Хитойда янги бизнес очиш ёки мавжудларини кенгайтиришни тақиқлаб қўйди. Бу ҳақда Хитой Тижорат вазирлиги баёнотига таяниб, «РИА Новости» хабар берди.
«Шимолий Кореядаги ташкилотлар ёки якка шахсларга мамлакатда хитойликлар ва хорижликлар иштироки, жумладан, уларнинг сармояси ёрдамида янги компания очиш, мавжудларини кенгайтириш тақиқланади», — дейилади баёнотда.
Шунингдек, Тижорат вазирлигининг хабар беришича, КХДРга инвестиция киритиш ва мавжудларини кенгайтириш бўйича резолюцияни бузадиган сўровларга ижобий жавоб қайтарилмайди.
БМТ Хавсизлик кенгаши 5 август куни бир овоздан КХДРга нисбатан санкцияларни кучайтирувчи 2371-резолюциясини қабул қилган эди. У Шимолий Кореядан темир, темир рудаси, қўрғошин, кўмир ва денгиз маҳсулотлари импортини тақиқлайди, КХДР ташқи савдо банки ҳисобларини музлатиб қўяди, БМТ резолюциясини бузган Шимолий Корея денгиз кемаларининг бошқа барча давлатларга кириши тақиқланади.
БМТга аъзо давлатлар ўз ҳудуларида Шимолий кореялик ишчилар сонини кўпайтирмасликка, КХДР билан янги қўшма корхоналар очмасликка ва мавжудларини кенгайтирмасликка мажбур.
Изоҳ (0)